warooody warooody

1,148 posts   301,854 followers   691 followings

طبخاتي ❤️تصويري  وصفات سهله ولذيذه 💕لا احلل اي حساب ينقل وصفاتي لحسابه بدون منشن ❤️❤️❤️ اي تعليق غير لائق = بلوك ✋🏻 الاعلان مجانا للمنتجات المجربه _الاحساء 🌹

اسرار نجاح اللقيمات ؛
بما ان شهر رمضان قرب بلغنا الله واياكم بصحه وعافيه يارب حبيت احط لكم اسرار بسيطه ل نجاح اللقيمات من تجربتي
١- نتاكد من صلاحيه الخميره
٢- نذوب الخميره و الكاسترد في الماء المكتوب في المقادير حتى نتجنب التكتلات اللي راح تصير و تعذبنا في الخلط
٣- نخلي العجين تتخمر بس مانزيد عن ساعه لانها راح يكون احتمال الفشل فيها كثير اذا تخمرت زياده عن اللزوم
٤- اذا تبغين اللقيمات يكون فازغ من الداخل لاتخلطين العجين قبل التلقيم خليها تحتوي ع الهواء حتى تكون فيها فراغات من الداخل و لو تحبينها من الداخل تكون مليانه العكس فرغي الهواء من العجين قبل التلقيم
٥- اول شي اسخن الزيت لين يصيح ساخن جدا بعدها اخلي النار هادئه ع اقل درجه لازم انزل درجه الحراره والا راح تتحمر من برا ومن داخل راح تكون عجينه
٦- اول شي راح احط قطعه وحده بس لو ارتفعت ع طول بيكون الزيت جاهز للتلقيم
٧- بعد ماحط اللقيمات و يمتلي المقلا اخلي جميع القطع ترتفع ل فوق و ارفع درجه الحراره ل العاليه مع التقليب المستمر حتى تتحمر اللقيمات من جميع الجهات بنفس الدرجه
٨- بعد ماطلع اللقيمات احطها ع ورق مطبخ يمتص الزيت و ماتكون ع بعض افضل
٩-اذا تبغين اللقيمات تكون مقرمشه اطول وقت ممكن اقلي اللقيمات لين يصير لونها ذهبي فاتح فقط وطلعيها من الزيت وبعد ماتخلصين من الكميه كلها رجعي اللقيمات مره ثانيه للزيت ع نار هادئه وقلبيها بسرعه مع خفت اليد لين يصير لونها بني وطلعيها ولا تغطينها حتى ماتلين وحطي عليها قطر ( او الشيره لازم تكون ثقيله وبارده ) او عسل او دبس التمر حسب الرغبه او احط عليها قبل التقديم
١٠- وهذا اهم نقطه دائما وابدا تسالوني عنها كيف اخلي اللقيمات ع شكل دائره الطريقه جدا سهله وراح تضبط معاكم بإذن الله .. استخدمو طريقه الملعقه
اول شي نجهز فنجان فيه زيت وملعقه معياريه حجم صغير ، نلبس قفاز ، اخذ جزء صغير من العجين في راحه ايدي و اضغطه راح يطلع ع شكل دائره واشيلها بالملقه واحطها بالزيت نحط الملعقه المعياريه داخل فنجان الزيت بين كل تلقيم واخر حتى ماتلزق العجينه فيها راح تكون القطع جميعها متساويه ودائريه للي مافهمت الطريقه مرفقه بالفيديو لفو يسار .. عجزت ماينزل كامل ف حطيت لكم بس جهة اليد لان هذا المهم
١١- اخيرا وليس آخرا ً طريقه اللقيمات اللي معتمدتها ع طول
المقادير
٢ كوب طحين
ملعقه كبيره حليب بودره
ملعقه كبيره خميرة
ملعقه كبيره سكر
٣ ملاعق كبيره نشا
٢ ملعقه كبيره كاسترد
رشة ملح
كوب ونصف ماء دافي ممكن اكثر او اقل حسب نوع الطحين المهم تكون العجينه اثقل من الكيك منشن ل شخص يستفيد من البوست

بسبوسه الهيل والزعفران
١ كوب سكر
١ كوب جوز الهند
١ كوب سميد
نص كوب ماي
نص كوب زيت
ثلاث بيضات
١ علبة قشطة
١ معلقة كبيرة بيكنج بورد
معلقة وسط هيل
شوي زعفران
وشوي فانيلا
شيره الحليب ؛
علبه حليب مبخر مثل حليب بو قوس او بوني
ربع كوب سكر
الطريقه ؛
نحط المواد الجافه مع بعض
سميد + جوز هند + باكنج باودر + هيل + زعفران
نخلط البيض والسكر والفانيلا لين يذوب السكر
نضيف الزيت والماء والقشطه ونخلط
واخر شي خليط المواد الجافه ملاحظه : الخليط بيكون شبه سائل .. وع صينيه مدهونه رشيت ع الوجه شرائح لوز
ونحطها في فرن ساخن درجه ١٨٠ من اسفل الرف الاوسط واذا نضجت احمرها من اعلى
اذا نضجت اجهز شيره الحليب السكر والحليب المبخر ع النار لين يفور ويذوب السكر و نسقيها الشيره وهي حاره وبس ❤️

كيكة الزبادي بالتوفي
المقادير ؛
٤ بيضات
كوب سكر او اقلل الى ثلاث ارباع كوب لان التوفي بعد فيه سكر .. فانيلا
علبه زبادي ١٧٠ غرام
نصف كوب زيت
٤ ملاعق كبيره حليب بودره
كوب ونصف طحين
ملعقه كبيره باكنج باودر
التوفي
ثلاث ارباع كوب سكر
ملعقه كبيره ماء
ملعقه كبيره زبده
علبه قشطه دافئه
الطريقه ؛
ينخل الطحين والباكنج و يوضع جانبا
يخلط البيض و السكر والفانيلا لين يصير الخليط لونه ابيض
نضيف الزبادي والحليب البودره واخلط
اضيف الزيت واخلط
واخيرا خليط المواد الجافه
احط خليط الكيك في قالب مدهون وع فرن ساخن درجه ١٧٠ الرف الاوسط من اسفل فقط لمده ٣٠ دقيقه
اذا نضجت اسوي التوفي
احط السكر والماي ع النار لين يتغير لونه يصير ذهبي
اضيف له الزبده واحرك
واخيرا قشطه دافيه واحرك بسرعه لو فيه تكتلات حركي فيه لين تذوب او انخليه بمنخل ثقوبه صغيره
وتزين فيه الكيكة وبس

شكرا لثقتكم 🥰
شكرا لكل من علق تعليق ايجابي ودعمني انتم مصدر سعاده بالنسبة لي 🌹🌹
اتمنى اكون عند حسن ظنكم ❤️
وترقبوا المزيد بإذن الله ...

صينيه كرات البطاطس بالدجاج
المقادير
صدور دجاج مقطعه مكعبات
بصل مقطع مكعبات صغيره
فلفل بارد ملون مقطع مكعبات
جزر مبشور
فلفل اسود
بهار
معجون طماطم
كزبره و بقدونس
مقادير الكرات :
٣ حبات بطاطس مسلوق ومهروس يخلط معاه
ملح
فلفل اسود
كزبره و بقدونس مقطعه بشكل صغير
٢ ملعقه كبيره جبن سائل
مقادير الصلصله البيضا :
٢ علبه قشطه
٢ ملعقه كبيره جبن سائل
ع الوجه :
جبن موزريلا
اوريغانو عند الرغبه
يمكن استبدالها ب خلطه البشاميل المعروفه
الطريقه ؛
يوضع البصل والفلفل البارد مع شوي زيت ع النار ويحرك لين يذبل
اذا ذبل بحط معجون الطماطم واحرك شوي
بعدها احط الدجاج والجزر والبهارات والملح والفلفل الاسود اخليه لين ينضج واحط بقدونس وكزبره واخلطها معاهم
احطه في صينيه
اكور البطاطس ع شكل كرات واحطها فوق حمسه الدجاج
اخلط مقادير الصلصله البيضا واحطهت ع الوجه
وارش شوي جبن موزريلا و رشه اوريغانو وع الفرن تتسبك شوي وبس 👌🏻

كيكة التويكس
المقادير
كوب طحين
كوب حليب بودره محموس ( يوضع ع النار مع التحريك لين يكون لونه اشقر )
نصف كوب زيت
٣ بيضات
نصف كوب ماء
ملعقة كبيره باكنج باودر
فانيلا
نصف كوب سكر
التغطيه ؛
علبه قشطه
٦ اصابع تويكس
شوي حليب سائل
الطريقه :
ننخل الطحين والحليب بودره المحموس والباكنج وتوضع جانبا
نخلط البيض و السكر والفانيلا لين يصير الخليط ابيض
نضيف الزيت والماي ونخلط واخيرا خليط المواد الجافه
يوضع الخليط في صينيه مدهونه وع فرن ساخن درجه ١٨٠ الرف الاوسط من اسفل فقط
اذا نضجت نسوي الخليط ونزين فيه الكيكة وبس ❤️

كيكه الحلزون بدون بيض 👌🏻: كاس حليب بودره
كاس سكر
كاس ونصف ماء
نصف كاس زيت
كاسين طحين
ملعقه ونصف باكنج باودر
جبن ابيض مالح او جبن كيري الجره اسهل طبعا
الطريقه:
نخلت الطحين والباكنج واخليهم ع جنب
يخلط السكر مع الماء والحليب البودره الى ان يذوب
ثم يضاف الزيت ويخلط ثم الطحين والباكنج
نخلطه ثم نضعه في صينيه مدهونه ونحط الجبن في القمع او كيس ونثقب شي بسبط من الزاويه ونحط داخله جبن كيري او جبن مالح حسب الرغبه ( انا حطيت جبن كيري ونشكله على شكل حلزون من الداخل الى الخارج و تدخل فرن ساخن درجه ١٨٠ الرف الاوسط
بعد ماتنضج احمرها شوي من فوق بعدين اطلعها و نحط عليها شوي شيره او عسل وارشها حبه سوده وبس بالعافيه

هذا شكل القوالب اللي استخدمتهم في المعمول للي سالوني ..خذتهم من موقع شي ان ب ١٥ ريال

معمول الكيري
المقادير ؛
٢ كوب وربع طحين
٢ قالب زبده = ٢٠٠ غرام كل قالب فيهم ١٠٠ غرام بدرجه حراره الغرفه
٦ حبات جبن كيري بدرجه حراره الغرفه
ثلاث ارباع كوب سكر بودره
الحشو :
كوب تمر بدون نوى
هيل مطحون ، قرفه مطحونه
ملعقه كبيره زبده نحركهم شوي ع النار بعدين اطحنه ف بيكون عندي عجينه تمر
الطريقه ؛
يخلط الزبده و السكر و الجبن جيدا
يضاف الطحين ويخلط ناخذ قطعه من العجين ونحشيها تمر ونكورها ونشكلها
نرش القالب شوي طحين حتى ينزل الشكل بسهوله ولا يلزق
بعض المتابعات يحطون تغليف الاكل بس ماجربت نجرب المره الجايه 👌🏻نخبز المعمول في فرن ساخن درجه ٢٠٠ من اسفل الرف الاوسط ١٠ دقايق تقريبا
بعدين من فوق يتحمر شوي وبس ❤️❤️

اسرار بسيطه لنجاح الكيك :
١- يفضل ان يكون جميع المقادير بدرجه حراره الغرفه
٢- نتاكد من تاريخ صلاحيه الباكنج باودر
٣- لازم نستخدم اكواب معياريه ف حال عدم توفرها يفضل استخدام نفس حجم الكوب في كل المقادير
٤ - ننخل المواد الجافه
٥- اثناء الخلط يكون باتجاه واحد حتى مايخرج الهواء اللي داخل الخليط ويساعد ع ارتفاع الكيك
٦- اذا حطيت الطحين ماكثر خلط مجرد يمتزج الخليط عدل اوقف خلط
٧- نتاكد ان الخليط امتزج جيدا وندهن القالب ب زيت وبعدها امسح بالمنديل الزيت الزايد واحط رشه طحين واقلب القالب واضربه حتى ينزل الطحين الزايد هالخطوه حتى ماتلزق الكيكه في القالب وتطلع بسهوله
٨- الفرن يكون ساخن قبل وضع الكيك فيه
درجه ١٨٠ م ٣٥٠ ف والرف يكون الاوسط
٩- مانفتح الفرن لين تعدي ع الاقل نصف ساعه او تطلع ريحه الكيك حتى ماتهبط معنا
١٠-ندخل عود شواء في المنتصف اذا طلع نظيف معناه انها نضجت ولو كان فيه خليط يعني باقي لها
١١- افضل طحين للكيك بالنسبه لي الكويتي .... . كيكة الرافيلو
المقادير :
كوب ونص طحين
ثلاث ارباع كوب سكر - او كوب سكر حسب الرغبه
كوب جوز هند
نصف كوب زيت
كوب حليب سائل
٣ بيضات
ملعقه كبيره باكنج باودر
فانيلا
شوي خل ابيض
الزينه ؛
نصف علبه حليب محلا
٤ حبات جبن كيري
جوز هند
الطريقه
ينخل الطحين والباكنج و يوضع جانبا
يخفق السكر والبيض والفانيلا والخل جيدا
يضاف الزيت والحليب .. يضاف له جوز الهند ويخلط
واخيرا خليط المواد الجافه الطحين والباكنج ونخلط
نحط الخليط في صينيه مدهونه وع فرن ساخن درجه ١٨٠ الرف الاوسط من اسفل فقط لين تنضج
بعد ماتنضج
نغطي الكيكة بالحليب محلا المخلوط مع الكيري وبعدها اغطيها ب جوز الهند وبس

الجرانولا او الغرانولا ع طريقتي .. سناك صحي ولذيذ
المقادير
٣ أكواب شوفان كامل الحبه كوب لوز شرائح
كوب جوز مجروش
ملعقه كبيره قرفه مطحونه
٢ ملعقه كبيرة زيت زيتون
٤ ملاعق كبيره عسل طبيعي او عسل صناعي
ثلاث ارباع كوب زبيب
كوب جوز هند رطب و ممكن الجاف العادي بس الرطب الذ
الطريقه
نخلط العسل مع زيت الزيتون ويوضع جانبا
نخلط المكونات الجافه ماعدا الزبيب نتركه ع جنب
نضيف العسل والزيت للمكونات الجافه ونخلطهم
نحط في صينيه فرن ورق زبده ونفرش عليه الخليط نحاول نزيل اذا فيه تكتلات من العسل شوي شوي حتى ماتتكسر حبات الشوفان وعادي اذا باقي تكتلات بسيطه راح نفكها بعدين
نشغل الفرن من اعلى فقط درجه ٢٥٠
بعد مرور ٤ دقايق اخذ ملعقه وافك التكتلات بلطف 😅 وبعدها خلاص يقلب كل شوي تقريبا كل ٤ دقايق لين يصير لونه اشقر تقريبا راح ياخذ وقت ٢٥ دقيقه اطفي الفرن و نخلط معاه الزبيب واخليه داخل الفرن وهو مطفي لمده ساعه حتى يبرد تماما ويجف ثم يوضع في علبه محكمة الاغلاق ويستخدم ك سناك او مع الزبادي والفواكة 👌🏻ملاحظه : صورة جوز الهند الرطب موجوده لفو الصوره يسار اخر شي

كيكة سريعه
المقادير
٢ كوب طحين
كوب وربع سكر
٣ بيضات
ثلث كوب زيت
رشه ملح
٢ ملعقه صغيره باكنج
ثلثين حليب سائل
فانيلا
٢ ملعقة كبيره كاكاو بودره
الطريقه
انخل الطحين + الباكنج + الملح مع بعض واحطهم ع جنب
اخفق البيض و الفانيلا والسكر لين يصير الخليط قوامه ابيض
اضيف الحليب والزيت واخلط
اضيف خليط المواد الجافه بعدين اشيل مقدار كوب من خليط الكيك واخلط معاه الشوكلاته البودره +ملعقهاو ملعقتين ماي
ندهن صينيه كيك واحط الخليط الابيض
بعدين احط الخليط البني وانزله ب شكل عشوائي ع الخليط الابيض
اخذ سكين واحرك المزيج شوي حتى يتداخل البني و الابيض
تدخل فرن ساخن درجه ١٨٠ الرف الاوسط من اسفل بس

Most Popular Instagram Hashtags