#ozodliK

MOST RECENT

Тошкент шаҳар прокуратураси жиноят содир этганликда гумон қилиниб қўлга олинган шахсларни қийноққа солгани даъво қилинган ИИВ ходимлари устидан хизмат текшируви бошлади.

Шу йилнинг 11 августида "Спарк" ва "Жигули" автомобили ҳайдовчилари орасидаги можаро видеоси Telegram тармоғида тарқалган эди.

Бу можаро ортидан қўлга олинган шахслардан икки нафарининг яқинлари ҳибс ва тергов чоғидаги қийноқ қўлланганини даъво қилмоқда.

Прокуратура ўз назоратига олди

Ўзбекистон Бош прокуратураси 18 октябрь куни Озодликка берган маълумотга кўра, шу йилнинг августида Тошкентда содир бўлган ҳодиса ортидан қўзғатилган жиноят иши юзасидан дастлабки тергов ҳаракатлари олиб борилмоқда. "Шунингдек, Тошкент шаҳар прокуратураси томонидан Ш.Жўраевнинг онаси Д.Жўраева ва Б.Нуритдиновнинг акаси Д.Нуритдиновларнинг "Озодлик" ижтимоий тармоғи ва Ўзбекистон Республикаси Президенти халқ қабулхонасига қилган мурожаатлари кўриб чиқилаётган бўлиб, уларнинг мурожаатлари юзасидан Ички ишлар ходимларига нисбатан хизмат текшируви тайёрланган, натижаларга кўра қонуний қарор қабул қилиниши таъминланади", дейилади Бош прокуратура Озодликка тақдим қилган жавобда.

Бу маълумотни тақдим қилган прокуратура расмийси эндиликда ишни Бош прокуратура ўз назоратига олгани, қонунийлик таъминланишини алоҳида таъкидлади.

Telegram тармоғида тарқалган видео

Шу йилнинг августида Telegram тармоғида бир неча йигит мачете пичоқ билан бир йигитни калтаклагани ҳамда машинага зўрлик билан ўтқазиб, номаълум манзилга олиб кетгани акс этган видео тарқалганди.

Мачете - қишлоқ хўжалигида ишлатиладиган махсус пичоқ. Шундай пичоқ билан ҳужум қилганлар яқинларининг иддао қилишича, пичоқ темирдан эмас, балки пластикдан бўлган ўйинчоқ эди.

13 август куни Тошкент шаҳар Ички ишлар бош бошқармаси видеода акс этган ҳодиса шу йилнинг 11 августида шаҳарда содир бўлгани ва ҳодиса юзасидан 277-моддага асосан “безорилик” айби билан жиноят иши қўзғатилганини маълум қилганди.

Тез орада ҳодисада – жабрланувчи кўрилган 3, айбланувчи кўрилган 2 киши, шу жумладан, Шоҳрух Жўраев ва Беҳзод Нуритдиновлар қўлга олинди.

18 октябрь пайшанба куни Тошкент вақти билан соат 14:00га яқин Москвадаги Ўзбекистон элчихонаси яқинидаги хиёбонда Ислом Каримов ҳайкалининг очилиш маросими бўлиб ўтди.

Тадбир кўпсонли полиция ва махсус хизматлар ходимларининг қаттиқ назорати остида ўтказилди.

Монумент очилишида 200 дан зиёд одам, жумладан Ўзбекистондан махсус таклиф қилинган меҳмонлар иштирок этди.

Полиция ходимлари билан ўраб олинган ёдгорлик яқинига журналистлар ва таклиф қилинганлар фақат рўйхат асосида қўйилди. ​Ҳайкал очилиши маросимида марҳум президентнинг беваси Татьяна Каримова, ҳайкал муаллифи, инглиз ҳайкалтароши Пол Дэй, Ўзбекистон Сенати раиси Ниғматилла Йўлдошев, Россия Федерацияси Кенгаши раиси муовини Николай Фёдоров, Россия Ташқи ишлар вазири ўринбосари Григорий Карасин, Москва мэри муовини Александр Горбенколар иштирок этишди.

Ўзбекистондан таклиф қилинганлар орасида Ўзбекистон Халқ артистлари Ёқуб Аҳмедов, Эркин Комилов, Лутфулла Саъдуллаев, Озодбек Назарбеков, Ўзбекистонда Хизмат кўрсатган артистлар Гавҳар Зокирова, Мирза Азизов, Ўзбекистон Халқ рассоми Азиз Нур ва бошқалар иштирок этди.

Тадбирда сўзга чиққан Татьяна Каримова Россия ҳукуматига миннатдорчилик билдириб, кеча куни Керчь шаҳрида содир бўлган фожеа муносабати билан ўз ҳамдардлигини билдирди.

Ислом Каримов хиёбонига ўрнатилган Ислом Каримов ҳайкалини ясаш, олиб келиш ва ўрнатиш марҳум президентнинг қизи Лола Каримова-Тиллаева ва беваси Татьяна Каримовалар бошқараётган Ислом Каримов Хайрия жамғармаси томонидан молиялаштирилгани хабар қилинган.

Якиманка туманида истиқомат қиладиган бир гуруҳ фаолларни полиция ходимлари маросим ўтаётган хиёбонга яқин йўлатмади. Фаоллар ҳайкал рўпарасидаги бино деразаларига бир нечта плакат осди.

Баннерлардан бирида “Позор” сўзи битилган.

Якиманкада Ислом Каримовга ҳайкал ўрнатилишига қарши акциялар ташаббусчиси маҳаллий депутат Андрей Морев Озодлик билан суҳбатда ёдгорлик яширинча 15 октябрга ўтар тунда ўрнатилганини айнан маҳаллийларнинг норозилиги билан боғлади. - Ҳозир Ўзбекистоннинг ўзида бу одамга, унинг бошқарувига нисбатан муносабат ўзгараётган бир пайтда нима сабабдан унга ҳайкал бизда туриши керак?

Ўзбекистон Миллий банки Андижон вилоятининг мансабдор шахслари ўзгалар мулкини ўзлаштириш йўли билан талон-тарожликларга қўл урганликда айбланмоқда.

Бу ҳақда Бош прокуратура матбуот хизмати хабар қилди.

Бош прокуратура қошидаги Иқтисодий жиноятларга қарши кураш департаментининг Андижон вилоят бошқармаси томонидан ўтказилган терговга қадар текширувда филиал мансабдор шахслари ва бошқалар олдиндан жиноий тил бириктириб, мазкур банк мижозлари ҳисобланган 10 та хўжалик юритувчи субъектнинг валюта ҳисоб-рақамларида бўлган 759 минг АҚШ долларини уларнинг хабарисиз бошқа хўжалик юритувчи субъектларнинг ҳисоб рақамларига ноқонуний ўтказган.

Мазкур ҳолат юзасидан Жиноят кодексининг 167-моддаси 3-қисми «а» ва «г» бандлари ҳамда 209-модданинг 2-қисми «а» банди билан жиноят иши қўзғатилгани хабар қилинди.
#ozodlik#uzbekistan

ЎЗБЕКИСТОН. “Бу йил биринчи теримда пахтанинг килосига 950 сўмдан тўланиши айтилганда, кўпчилик теримда ихтиёрий қатнашиб, уч-тўрт сўм ишлаб олишни ният қилгани рост. Аммо далага чиқдию теримчиларнинг ҳафсаласи пир бўлди. Биринчидан, узоқдан келган ҳашарчиларга ётиш учун шароит яратилмаган. Қолаверса, терим пули кечиктирилмоқда. Бундан ташқари, терилган пахта вазни чегириб ҳисобланмоқда. Масалан, 100 кг пахта терсангиз, 15 кг дан 25 кг гача чегириб ташланмоқда. Буларнинг бари терим суръатига салбий таъсир этмоқда. Бу ҳолни мамлакатнинг деярли барча ҳудудларида учратиш мумкин”. (Бу хабар Озодликка 15 октябрь куни юборилган.) ​#ozodlik#uzbekistan

НАРПАЙ. “Самарқанд вилояти Нарпай тумани Мустақиллик маҳалласидан мактуб йўлламоқдамиз. Биз маҳалламиз ҳудудидаги “Худоёр Ҳосилот” фермер хўжалигида пахта теряпмиз. Аммо теримчиларга шароит яратилмаган. Иссиқ овқат ва чойни айтмай қўяқолайлик, ҳатто тоза ичимлик суви ҳам йўқ. Қўшни фермерлар теримчиларга бир кило пахта учун 750 сўм ва ундан кўпроқ тўламоқда. Бизга эса 650 сўмдан беришмоқда. Шунда ҳам ҳар 10 кило пахтадан 1-1,5 кило чегириб ҳисобланмоқда. Шароит яратиб беришини сўраб фермер хўжалиги раҳбарига арз қилайлик десак келмайди. У ишни ишониб топширган бригадир эса ҳеч қандай ёрдам бермаяпти”. (Бу хабар Озодликка 15 октябрь куни юборилган.)#ozodlik#uzbekistan#samarkand#samarqand

БЎКА. “Тошкент вилояти Бўка туман тиббиёт бирлашмасидан ёзмоқдаман. Бош шифокоримиз ходимларни пахта даласига мажбурлаб чиқарди. Теримга чиқмаганлар ишдан ҳайдалар экан. Ер зах, кўпчилик шамоллаган. Қолаверса, шифокорлар теримда экани боис беморлар ҳам сарсон бўлмоқда. Президент тиббиёт ва таълим соҳаси вакиллари пахтага чиқарилмаслиги ҳақида топшириқ берган эди. Аммо қизиқ жиҳати, айнан Президент Бўкага келиб кетганидан кейин биз тиббиётчиларни далага ҳайдашди.

Мажбуран пахта теряпмиз, аммо терим пулидан дарак йўқ. Ўзи шундоқ сўконғич бўлган бош шифокоримиз пахта мавсумида янада қутуриб кетди”. (Бу хабар Озодликка 15 октябрь куни юборилган)#ozodlik#uzbekistan#toshkent

БУХОРО. “Бухоро шаҳридан ёзмоқдамиз. Мустақиллик кўчасидаги 47-уй иссиқлик тизимига уланмаган. Подъезд деразасига ром ўрнатилган, аммо ойналари йўқ. Қисқаси, кўп қаватли уй қишки мавсумга умуман тайёр эмас. Маҳаллий идоралардан амалий ёрдам кутиб қоламиз”.​ #ozodlik#uzbekistan#buxoro

ЧОРТОҚ. “Наманган вилояти Чортоқ тумани Ҳазратишоҳ қишлоғидан ёзмоқдамиз. Қишлоғимиз ҳудудида Қирғизистон чегарасига 5 км масофада ноқонуний пост ўрнатилган. Ушбу постда аскарлар ҳар бир одамни рўйхат бўйича ўтказади. Бу эса чегара яқинида яшовчи аҳолига машаққат ва қийинчилик туғдирмоқда. Кўп сонли аҳоли номидан ушбу постни олиб ташлашларини сўраймиз”.​ #ozodlik#uzbekistan#namangan

ШАҲРИХОН. “Андижон вилояти Шаҳрихон туманидан ёзмоқдамиз. Туман туғруқ мажмуаси вайрон ҳолатда экани ва санитария талабларига риоя этилмаётгани хусусида мактубимиз чоп этилгач, шахсан Соғлиқни сақлаш вазири Алишер Шодмонов келиб муаммони ҳал қилишга сўз берди. Ҳомиладор аёллар шароити яхшироқ саналган марказий шифохонага кўчирилди. Туғруқ комплекси эса капитал таъмирланиши айтилди. Аммо, афсуски, вазир кетганидан сўнг қоп-қоп ваъдалар ҳам унутилди, ҳомиладор аёллар яна хароб аҳволдаги туғруқ комплексига қабул қилинмоқда.

Нима, вазир хўжакўрсинга келиб кетдими? Ё маҳаллий раҳбарлар вазирни алдаб-сулдаб жўнатиб юборишдими? Президент соғлиқни сақлаш тизими, хусусан, оналик ва болаликни муҳофаза этишдаги муаммоларни тез фурсатда ҳал қилишни талаб қилмоқда. Андижонда эса давлат раҳбари топшириқлари саботаж қилинаётганга ўхшайди”.​#ozodlik#uzbekistan#andijon

Тожикистоннинг айрим минтақаларига кутилмаганда ёққан қор фермерларни ташвишга солиб қўйди. Қалъаи Дашт, Мискинобод жамоатлари ва бошқа қишлоқлар аҳолиси томонидан етиштирилган сабзавот ва мевалар қор остида қолиб кетди.

Файзобод туманидаги жамоатларнинг аҳолиси асосан қишлоқ хўжалиги билан шуғулланади. Бу ерда асосан олма боғлари бор. Куни кеча ёққан қор олма ҳосилини йўқ қилди, аҳоли эса ерга тушган олмаларни термоқда. Файзобод туман боғбонлари 10 кун аввал ҳосил йиғим теримига киришган эди, шу кунга қадар мева ҳосилининг атиги 50%ни йиғиштириб олишга улгурдилар.  Бобои Вали маҳаллласида яшовчи Тағоймурод Усмоновнинг 17 октябрь куни айтишича, қўшни фермер хўжалигида 40-50 тонна олма йиғиштирилмай қолиб кетди. «Барча мевалар, худди картошка, нўхат ва карам сингари қор остида қолиб кетди. Ҳамма хўжаликлар зарарни ҳисобламоқда. Пулга чаққанда мен тахминан 50-60 минг сомони (6 минг доллардан кўп) зарар кўрдим», - дейди суҳбатдошимиз.

Фермерлар қор туфайли ҳатто етиштирилган ҳосилни тўплаб, уларни омборга олиб боришга ҳам улгуришмади: ҳосил совуқ туфайли музлаб қолди, улар истеъмолга яроқсиз ҳолга келди.

Қальаи Дашт деҳқон хўжалиги раиси Насрулло Раҳимовнинг айтишича, эндигина ҳосилни йиғиштириб олишга киришганларида ёмғир ёққан. «Биз ҳосилни целлофан билан ёпдик ва кейинроқ йиғиштириб олмоқчи бўлдик. Бироқ ёмғир қорга айланди. Биз 15 тонна олмадан айрилдик», - дейди раис. Фермерларнинг айтишларича, биргина Қалъаи Дашт жамоатида 2000 тонна олма қор остида қолган.

Файзобод туманидаги Бобои Вали қишлоғида истиқомат қилувчи Тоғаймурод Усмонов ҳам зарарни ҳисобламоқда. «Бир гектар ортиқ ерда картошкам бор эди. Ҳосил тўлалигича қор остида қолди. Ҳосилни тўплашнинг имкони йўқ. Қор эриб кетганидан сўнг музлаган ҳосилни териш мумкин ёки мумкин эмаслигини биламиз», - дейди Тоғаймурод Усмонов.

Кучли қорбўронлари туфайли маҳаллий аҳоли электроэнергиясидан бебаҳра қолди: қорларни кўтара олмаган дарахтлар электрузатиш линияларига зарар етказди. Тоғли бу қишлоққа элтувчи йўллар ҳам қор остида қолди.
#ozodlik#tajikistan

АҚШнинг Атланта шаҳрида жойлашган Around the Rings интернет нашрига интервью берган ўзбек жиноят дунëсининг авторитетларидан экани иддао қилинадиган Ғафур Раҳимов¸ ўзини Гулнора Каримова қурбонларидан бири сифатида тақдим этди.

2-3 ноябрь кунлари Халқаро бокс ассоциацияси (AIBA) Москвада ўз янги президентини сайлаши керак.

Ғафур Раҳимов президентликка номзоди қўйилган ягона шахс бўлиб турган бир пайтда¸ Халқаро олимпия қўмитаси (ХОҚ) Ғафур Раҳимов Халқаро бокс ассоциацияси (AIBA) президенти этиб тайинланадиган бўлса, Олимпиада ўйинлари дастуридан бокс чиқариб юборилиши мумкинлиги тўғрисида баёнот берди.

Бундай баëнотга¸ Раҳимовнинг 2012 йили АҚШ Молия вазирлиги томонидан “ўзбек уюшган жиноят олами етакчиларидан бири” деб баҳоланиб¸ уюшган халқаро гуруҳ етакчиларига қарши жорий қилган санкциялари рўйхатига киритилгани ва ҳамон шу рўйхатда қолаëтгани асос бўлган.

Ана шу вазиятда Олимпия қўмитаси янгиликларини ëритишга ихтисослашган Around the Rings интернет нашрига интервью берган Раҳимов¸ янги ҳукумат ўзининг фитна қурбони бўлганини яхши билганидан¸ унинг номини оқлашда бевосита қатнашаëтганини билдирди.

Раҳимов “ҳақиқати”

Around the Rings интернет нашрига берган интервьюсида “AIBAга аъзо федерациялар келаси ойги конгрессда муҳим танлов қилишлари керак ва шу боис улар ҳақиқатни билишлари шартдир”¸ деган Ғафур Раҳимов¸ қандай қилиб АҚШ Молия вазирлиги томонидан “трансмиллий жиноий гуруҳлар вакили” деб таснифланишига оид ўз ҳикоясини айтади. “Менга қарши кампания тепасида олдинги президентнинг қизи Гулнора Каримова ва унинг шериклари турди. Улар Ўзбекистондаги бизнесимдан улуш талаб қилди ва бошқа бизнесменлар каби менга ҳам таҳдид қилди. Мен йўқ дедим. Аммо босим давом этди ва мен 2010 йили оилам ва ўзимнинг хавфсизлигим учун мамлакатни тарк этишга мажбур бўлдим”¸ дейди АҚШ нашрига берган интервьюсида Ғафур Раҳимов.

Ғафуров иддаосича¸ шундан сўнг ўша пайтда қудратли бўлган Каримова ва унинг гуруҳи ўзига қарши “нотўғри ахборот тарқатиш”га киришган ва АҚШ Молия вазирлигига “қолган бизнесини йўқ қилиш мақсадида сохта айбловларни тақдим этган”. Янги ҳукумат – Очилбой Раматов - Ғафуров ҳимоясида

Журналист ва шоир Салим Ашур Ўзбекистон Республикаси Президенти администрациясининг Оммавий ахборот воситалари, телевидение ва матбуотни ривожлантириш шўъбаси мудири этиб тайинланди. Бу ҳақда kun.uz хабар қилди.

Шунингдек, Баҳодир Махсутович Юнусов шўъба бош консультанти, Элбек Улуғбекович Долимов эса шўъбанинг етакчи консультанти лавозимига тайинланган.

Салимбой Ашуров охирги вақтларда президент аппаратида ишлаган, Баҳодир Юнусов Бош прокуратура мультимедиа марказида, Элбек Долимов эса Ахборот технологиялари ва коммуникацияларини ривожлантириш вазирлиги матбуот котиби лавозимида фаолият кўрсатиб келаётганди.

Шу ой бошида Комил Алламжонов президент маъмурияти раҳбари ўринбосари ва президент матбуот котиби лавозимидан озод этилган эди.

Комил Алламжонов 2017 йилнинг декабридан президент матбуот котиби сифатида ишлаб келаётган эди.

#ozodlik#uzbekistan

Сурхондарёнинг Денов тумани Беруний қишлоғидаги фермер хўжалиги раҳбари Шерали Бекназаров 14 октябрь куни ўз уйи подъездида осилган ҳолда топилди.

Қариндошлари ва маҳалладошлари Озодликка 61 ёшли фермернинг пахта заводига белгиланган нормада пахтани топширмагани учун тазйиққа олиниши ортидан жонига қасд қилганини айтди.

Ўзини осган 61 ёшли фермер Шерали Бекназаров Сурхондарёнинг Денов тумани Беруний қишлоғида 15 октябрь куни дафн этилди.

Қариндошлари ва деновлик бошқа фермерларнинг Озодликка айтишларича, ўлимидан олдин Денов тумани пахта пунктида ўтказилган пахта йиғим-теримига бағишланган мажлисда туман ҳокими Бекназаровни кунлик пахта топшириш режасини бажармаган бошқа ҳамкасблари қаторида ҳақорат аралаш қаттиқ койиган.

Таъқибга олиниш эҳтимоли мавжудлигидан чўчиб шахси сир тутилишини сўраган маҳаллий фермерлардан бири бу ҳақда Озодликка шундай деди: - Мен ҳам шу мажлисда бор эдим. Ўша куни йиғилишда турғизиб, ҳаммани олдида изза қилди. Уйингдан пиёланггача тортиб оламиз, деб камситди. Бизда мажлисларда пахта планини бажармаётган фермерлар қандай сиқувга олинишини билсангиз керак, ҳозир фермерларга аввалги йиллардагидан босим ўн чандон кўп бўляпти. Шерали ака чидай олмаган, заифлик қилиб уйини подъездига ўзини осган.

Фермер - пахта тазйиқи қурбони

Ўз жонига қасд қилган 61 ёшли фермер Шерали Бекназаров​ рафиқаси ва 23 ёшли ўғли билан Денов тумани Беруний қишлоғидаги икки қаватли уйдаги икки хонали квартирада яшаган.

Марҳум Бекназаровнинг исми сир қолишини истаган яқин қариндоши Озодликка 14 октябрь куни бўлган воқеани сўзлаб берди: - Кечқурун мажлисдан анча тушкун ҳолда келдилар. Ҳамма нарсани айтмадилар, лекин кўринишидан ёмон қилишган. Ҳоким ҳаммани олдида ҳақорат қилган, таҳқирлаган, "керак бўлса кўчада қолдираман, ҳамма нарсангни тортиб оламан" деган, ерга урган. Гаплашиб бўлганимиздан сўнг "энди бориб ухланглар", деди. Эрталаб домни подъездида осилган ҳолда кўрдик.

Сурхондарёдаги масъул идоралар вакиллари олдинига фермер ўз жонига қасд қилганини рад этишга уринди.

Денов тумани ҳокимининг Қишлоқ ва сув хўжалиги масалалалари бўйича муовини Шаймамат Шерқобулов фермер хўжалиги раҳбари ўлимидан хабари борлиги, лекин у ўзини осмаганини айтди.

Мева-сабзавот маҳсулотларини ташқи бозорларга чиқариш самарадорлигини оширишга доир қўшимча чора-тадбирлар тўғрисида Ўзбекистон Республикаси Президентининг қарори қабул қилинди. Бу қарорнинг қанчалик муҳимлигини унда белгилаб қўйилган мана бу меъёрдан ҳам тушунса бўлади: экспорт қилинадиган мева-сабзавот маҳсулотлари божхона кўригидан ўтказилмайди​. Адлия вазирлигига кўра, Қарорга биноан:

юридик шахслар – мева-сабзавот маҳсулотлари экспорт қилувчилари мева-сабзавот маҳсулотлари экспортини дастлабки тўловсиз, аккредитив очмасдан, банк кафолатини расмийлаштирмасдан ҳамда экспорт шартномасини сиёсий ва тижорат хавфларидан суғурта полисисиз амалга ошириш ҳуқуқига эга;

мева-сабзавот маҳсулотлари экспортидан тушумларни ўз вақтида таъминламаган мева-сабзавот маҳсулотлари экспорт қилувчилари мева-сабзавот маҳсулотларини экспорт қилишда 100 фоизлик олдиндан тўлов олиш талаблари уларга қўлланган ҳолда ноҳалол мева-сабзавот маҳсулотлари экспорт қилувчилар реестрига киритилади;

тадбиркорлик субъектлари улгуржи савдо қилиш лицензиясига эга бўлмасдан мева-сабзавот маҳсулотлари экспортини амалга ошириш ҳуқуқига эга. Бунда экспорт тушумларига ягона солиқ тўлови тўланишини назарда тутувчи солиққа тортиш тартиби қўлланилади;

экспорт қилинадиган мева-сабзавот маҳсулотлари божхона кўригидан ўтказилмайди;

тадбиркорлик субъектлари ўзларига ажратилган ер участкаларида мева-сабзавот маҳсулотларини бевосита уларни етиштириш жойларида суғориш, тайёрлаш ва сақлаш бўйича инфратузилма объектлари қуриш учун енгил конструкцияларни қуриш юзасидан қурилиш-монтаж ишларини амалга оширишлари мумкин.

Қарорга мувофиқ Ўзбекистон мева-сабзавот маҳсулотларини экспорт қилувчилар уюшмаси ташкил этилади.

Бундан ташқари, “Global GAP”, “Halal” ва “Organic” стандартлари талабларига мувофиқликка сертификатлаштириш бўйича халқаро тан олинган ташкилотлар билан ҳамкорлик ўрнатилади.

2019 йил 1 мартга қадар:

интернет тармоғида “TradeUzbekistan.com” электрон савдо майдончаси ҳамда экспорт жараёнининг барча босқичларини реал вақт режимида кузатиш имконини берувчи Мева-сабзавот маҳсулотларини экспорт қилувчилар ахборот портали яратилади;

Қирғизистоннинг Норин вилоят мусиқали-драма театри труппаси Тошкентга ижодий сафар билан келди. Иттифоқ қулаганидан кейин жиддий иқтисодий муаммоларга дуч келган бу театр 2018 йилдан бошлаб гастроль сафарлари хорижга чиқа бошлаган.

Норинлик актёрлар Тошкентда Чингиз Айтматовнинг “Асрга татигулик кун” романи асосида режиссёр Султан Раев саҳналаштирган “Ман” спектаклини намойиш этганлар.

Мазкур драма Қозоғистон пойтахти Остона шаҳрида ўтказилган халқаро театр фестивалида юксак соврин — Гран-при билан тақдирланган.

Театр актёри Канат Мамирқановга кўра, Тошкентдан сўнг труппа Россиянинг қатор шаҳарларига, шундан сўнг эса Лондонга сафар қилмоқчи.
#ozodlik#kyrgyzstan#uzbekistan

Ўзбекистонда 2019/2020 ўқув йилида ишга тушадиган Akfa халқаро университети хусусий мулк асосида очилиши кутилаётган илк университетлардан бири бўлади. Президент маслаҳатчиси Абдужаббор Абдувоҳитов кўра, бу каби олийгоҳларни ташкил этиш орқали мамлакатда таълим соҳасида очилмаган, янги истиқболларга эришиш мумкин.

А.Абдувоҳитов бу фикрни 17 октябрь куни Тошкент давлат иқтисодиёт университети биносида ташкил этилган матбуот анжуманида билдирди. Ўзбекистон президентининг “Тошкент шаҳрида Акфа халқаро университетини ташкил этиш тўғрисида"ги қарори ўтган ҳафта Норматив ҳуқуқий ҳужжатлар лойиҳалари муҳокамаси порталида эълон қилинган.

Қарорда олийгоҳни ташкил этиш ташаббуси Соғлиқни сақлаш вазирлиги, Олий ва ўрта махсус таълим вазирлиги ҳамда “Akfa Medline” МЧЖга оидлиги қайд этилган. “Akfa Medline” МЧЖ AKFA ширкатлар гуруҳи томонидан ташкил этилган хусусий кўп профилли тиббий марказдир. AKFA ширкатлар гуруҳининг эгаси Тошкент шаҳар ҳокими Жаҳонгир Ортиқхўжаев бўлиб ҳисобланади.

Таълим инглиз тилида амалга ошириладиган Akfa университети, президент қарорида айтилишича, иқтисодиётнинг реал сектори тармоқларининг аниқ эҳтиёжларини ҳисобга олган ҳолда фундаментал, аниқ, тиббиёт ва гуманитар фанлар бўйича юқори малакали мутахассисларни тайёрлаш билан шуғулланади.

Университетда таълим кундузги таълим шаклида тўлов-контракт асосида амалга оширилади.

Университет фаолияти таъсисчилар ҳамда тўлов-контракт асосида ўқишга кирувчи талабалар маблағлари ҳисобига молиялаштирилади.

Университет 2022 йил 1 январгача барча турдаги солиқлар ва давлат мақсадли жамғармаларига мажбурий тўловларни тўлашдан озод этилади.#ozodlik#uzbekistan

Жорий йил ўтган 9 ойи мобайнида Ўзбекистонда энг кам ўртача номинал иш ҳақини тиббиёт ходимлари ва ўқитувчилар олганлар. Бунга Давлат статистика қўмитаси эълон қилган ҳисоботни ўрганиш давомида амин бўлиш мумкин.

Қўмитанинг келтиришича, мазкур вақт мобайнида соғлиқни сақлаш ва ижтимоий хизматлар кўрсатиш соҳалари вакилларининг ўртача номинал иш ҳақлари 1 миллион 85 минг сўмга тенг бўлган. Таълим соҳаси вакиллари эса ўртача 1 миллион 275 минг сўм ойлик олганлар.

Айни пайтда энг юқори ўртача ойликни молиячи ва суғуртачилар олган бўлиб, уларнинг ўртача номинал иш ҳақи 3 миллион 213 минг сўмни ташкил этган.

Ахборот ва алоқа соҳалари Ўзбекистонда нисбатан юқори маош оладилар - уларнинг ўртача номинал иш ҳақи тақрибан 3 миллион 197 минг сўмдир.

Давлат статистика қўмитаси 2018 йилнинг январь-сентябрь ойларида Ўзбекистонда ўртача ойлик номинал ҳисобланган иш ҳақи 1 млн 684,5 минг сўмни ташкил этгани, бу 2017 йилнинг шу даврига нисбатан 22,9 фоизга кўп эканини маълум қилади.#ozodlik#uzbekistan

“Ўзбекистон темир йўллари” акциядорлик жамияти жорий йил 1 ноябридан “Afrosiyob” тезюрар поездлари чипталари нархини оширмоқчи.

Компания матбуот хизмати ёйинлаган хабарномадан келиб чиқилса, нархларни оширишга электр энергияси, хомашё, ҳаракатланиш давомида вужудга келадиган барча харажатларни қоплаш ва ходимларга муносиб иш ҳақи тўлаш важидан эҳтиёж туғилган.

Шу кунда тезюрар поездлар Тошкент-Бухоро-Тошкент, Тошкент-Шаҳрисабз-Тошкент, Тошкент-Самарқанд-Тошкент йўналишлари бўйлаб ҳаракатланмоқда. "Afrosiyob" поездларида чипта нархи сўнгги бор шу йил август ойида тақрибан 35 фоизга оширилганди. Бу гал чипта нархи неча фоизга ошиши ҳақида ҳозирча маълумот йўқ.
#ozodlik#uzbekistan

Ўзбекистонда хизмат кўрсатган артист Матёқуб Матчонов 16 октябрь куни “Ўзбекистон Киноарбоблари ижодий уюшмаси” нодавлат нотижорат ташкилотига раис этиб сайланган. “Ўзбеккино” миллий агентлиги матбуот хизматининг маълум қилишича, Уюшма Ўзбекистон президентининг шу йил 24 июлида чиқарилган “Миллий киноиндустирияни ривожлантириш бўйича қўшимча чора-тадбирлар тўғрисида”ги қарорига мувофиқ қайта ташкил этилган.

Тошкентдаги “Алишер Навоий” номли киносаройнинг катта залида Уюшманинг сешанба куни бўлиб ўтган илк конференцияси таниқли актёр М.Матчонов раисликка бир овоздан сайланган. Шунингдек, мазкур анжуманда ташкилотнинг келгусида бажариладиган мақсадли режалари белгилаб олинган.#ozodlik#uzbekistan

Тошкентда 18-19 октябрь кунлари бўлиб ўтадиган Ўзбекистон-Россия таълим форуми сессиялари доирасида умумий ҳисобда 127 та келишув имзоланиши кутилмоқда. Бу ҳақда Ўзбекистон бош вазир ўринбосари Азиз Абдуҳакимов Кун.уз сайтига маълум қилган.

Форум Россия президенти Владимир Путиннинг Ўзбекистонга ташрифи доирасида бўлиб ўтади.

Келишувга мувофиқ, Ўзбекистон пойтахтида Москва давлат халқаро муносабатлар институти ("МГИМО") филиалини ташкил қилиш, Тошкент кимё-технология институти базасида эса Россиянинг Д.И.Менделеев номидаги кимё-технология университети филиалини ишга тушириш режалаштирилаяпти.

18 октябрь оқшомида Россия президенти Владимир Путин бошчилигидаги қарийб 1000 кишилик расмий делегациянинг Тошкентга келиши кутилмоқда.#ozodlik#uzbekistan#russia

Most Popular Instagram Hashtags