#ozodliK

MOST RECENT

Тошкент вилоят, Чирчиқ шаҳрида жойлашган “Maxam – Chirchiq” корхонасининг юздан зиёд ишчиси 13 июлдан буён ҳар куни ўз иши қолиб, Оҳангарон шаҳридаги ободонлаштириш ишларига сафарбар қилинмоқда.

Бу ҳақда Озодликка шикоят қилган ишчиларнинг айтишича, улар Оҳангаронда бузилишга тушган уйларни бузиш билан шуғулланмоқда.

Жазирама иссиқда уй бузишга мажбурланаётган ишчилар, улар ҳатто ичимлик сув билан таъминланмаётганини айтмоқда.

Корхона маъмурияти ишчиларнинг Оҳангаронга сафарбар этилаётганини тасдиқлади, лекин буни изоҳлаб беришдан ўзини олиб қочди.

Чирчиқ шаҳридаги “Ўзкимёсаноат” компаниясига қарашли “Maxam – Chirchiq” акциядорлик компаниясининг юздан ортиқ ишчиси ҳар куни Оҳангарон шаҳрига мажбуран уй бузиш учун сафарбар этилаётгани ҳақида, ана шу корхонанинг ишчилари Озодликка хабар берди.

Озодлик суҳбатлашган корхона ишчиларидан бирининг айтишича, ҳар куни йўл ҳаракати хавфсизлиги ходимлари назоратисиз завод олдидаги майдончадан 120 киши автобусларда олиб кетилади: “Ҳар куни учта автобусда олиб кетилади. Автобуслар кичкина, тиқилинч, 82 километрга бир ярим соат йўл юрамиз. Одамларнинг ярми тик кетади. Автобуслар эрталаб соат 7 да заводдан жўнайди. Соат 8.40 дан иш бошлаймиз. Бир соат тушлик, кейин то автобуслар келгунча, соат 7 ларгача яна ишлаймиз”, - дейди корхона ишчиси.

Ишчи улар оғир ишларни қилишга мажбурланаётгани ва сувсизликдан қийналаётганидан ҳам шикоят қилди: “Оҳангаронда йўл бўйидаги дўконлар, фитнес марказлар, заправкалар, салонлар, хуллас нимаики бўлса бир четдан бузиб кетяпмиз. Бу жойларда электр ва сув ўчирилган. Иссиқда оддий сув топишнинг ўзи имконсиз бўлмоқда. Ишчиларимиз жуда қийналиб кетди. Агар ким бош тортса, ишдан кетказиш билан таҳдид қилиняпти. Биз минерал ўғитлар ишлаб чиқарадиган корхона ишчилари бўлсак, нега бизни Оҳангаронга олиб бориб ишлатишади?”, дейди корхона ишчиси.

Ишчининг айтишича, шанба ва якшанба кунлари ҳам ишчилар Оҳангаронга олиб кетилмоқда.

Корхонанинг Озодлик суҳбатлашган бошқа ишчисининг иддао қилишича, бир қанча ишчилар уй бузаётганда жароҳат олган:

Афғонистонда тинчлик музокарасини олға сураётган Тошкент шимолдаги ўзбекларнинг афғон ҳукуматига нисбатан норозилигини эътиборсиз қолдираётгани айтилмоқда. Ташқи ишлар вазири Абдулазиз Комилов бошлиқ ҳукумат делегациясининг яқинда Афғонистонга қилган сафари шимолдаги ўзбекларнинг ҳукуматга нисбатан норозилиги кучайган бир даврга тўғри келди.

Шимолдаги вилоятлар аҳолиси этник ўзбек генерали, Афғонистон Вице-президенти Абдулрашид Дўстум вакили бўлган Низомиддин Қайсорийнинг озод этилишини талаб қилмоқда.

Маҳаллий полиция бошлиғи бўлган Қайсорий ҳукумат кучлари томонидан ҳибсга олинган. Ушбу ихтилоф унинг генарал Дўстумга яқин экани билан изоҳланмоқда.

Айни пайтда генерал Дўстум Туркияда, аммо унинг тез кунларда ватанига қайтиши мумкинлиги ҳақида хабар берилмоқда.

Ўзбекистон Ташқи ишлар вазири Абдулазиз Комилов бошлиқ делегация 8-9-июль кунлари Кобулда бўлиб, бир қатор расмий учрашувлар ўтказган эди. Кобулда Президент Ашраф Ғани, ҳукуматнинг бир қатор раҳбарлари билан учрашган Комилов асосан толиблар ва ҳукумат ўртасидаги мулоқот имкониятлари ҳақида музокара юритгани хабар қилинади.

Сафар юзасидан эълон қилинган расмий хабарга кўра, Комиловнинг Афғонистон Президенти Ашраф Ғани, ҳукумат Ижрочи раиси Абдулла Абдулла, Хавфсизлик кенгаши раҳбари Муҳаммад Атмар, Ташқи ишлар вазири Раббоний, собиқ президент Ҳамид Карзай билан ўтган учрашувларида асосан тинчлик жараёни, мамлакатни янада ривожлантириш ва миллий бирдамликка эришиш истиқболлари юзасидан фикр алмашилган.

Комиловнинг сафарини мамлакат шимолидаги этник ўзбеклар норозилиги билан боғлиқ дейиш қийин. Ўзбекистон Ташқи ишлар вазирлиги уч ҳафтадан буён Афғонистон шимолида давом этаётган бу норозиликлар юзасидан бирор муносабат билдиргани йўқ.

Таҳлилчи Фарҳод Толиповга кўра, янги ҳокимият даврида Афғонистон билан муносабатларда умумий ўзгариш бор, аммо буни шимолдаги ўзбек аҳолисига дохил дейиш қийин.

21 июль куни Тошкент шаҳар ҳокимлигида ўтказилган “Тошкент шаҳрини ривожлантириш ва инвестицияларни жалб қилиш”га бағишланган “очиқ эшиклар” кунини очар экан, kun.uzга кўра, шаҳар ҳокими Жаҳонгир Ортиқхўжаев бундай деган: “Сафимизга борган сари янги тадбиркорлар ва инвесторлар қўшилмоқда. Мақсадимиз битта - шаҳарни ривожлантириш ва аҳоли фаровонлигини таъминлаш. Анча йиллар, деярли, 25 йил давомида ухлаб қолган мамлакатни уйғотиш.

Ҳокимлик жамоаси ҳаммага ёрдам беради. Ҳеч қандай коррупциясиз. Фақат бир илтимос - лойиҳангизни виждонан бажаринг. Мавжуд биноларни бузилишга тушириб, қуришни режалаштирманг. Бизнинг бир шиоримиз бор - сизлар билан ишлаш жараёнида очиқлик ва шаффофликни таъминлаш”, - деган Ортиқхўжаев.

Тадбирда 100дан ортиқ тадбиркор ва инвесторлар қатнашмоқда. Тошкент шаҳар ҳокими ҳар бир тадбиркор ва инвестор билан шахсан суҳбатлашмоқда. Уларнинг лойиҳалари билан танишмоқда.

26 апрель куни Тошкент шаҳрига олти йил давомида ҳокимлик қилган Раҳмонбек Усмонов бошқа ишга ўтказилган ва унинг ўрнига Жаҳонгир Ортиқхўжаев тайинланган эди.

43 яшар Жаҳонгир Обидович Ортиқхўжаев (Артикходжаев Жахонгир Абидович) – ҳокимликка тайинлангунга қадар Tashkent City давлат унитар корхонаси директори¸ айни пайтда¸ «Артел Инжиниринг» (Artel Engineering) масъулияти чекланган жамияти директори бўлиб ишлаган; Ўзбекистон алюминий ва пластик эшик-ойналар бозоридаги асосий ўйинчи ҳисобланган Акфа гуруҳи эгасидир.
#ozodlik#uzbekistan#toshkent

20 июль куни Ўзбекистон мусулмонлари идораси раҳбари, муфтий Усмонхон Алимов буйруғи асосида Тошкент шаҳрида жойлашган “Шайх Зайниддин” масжиди имом хатиби Одилхон қори Юнусхон ўғли ўз вазифасидан озод этилди.

Бу ҳақда хабар қилган kun.uz сайтининг ёзишича, унинг ўрнига Тошкент шаҳри, Чилонзор туман бош имом хатиби Абдукаримов Хусниддин Тожиддинович “Шайх Зайниддин” масжиди имом хатиби лавозимига тайинланган.

Одилхон қори Юнусхон ўғлининг нима сабабдан лавозимидан озод этилганига аниқлик киритилмаган. Ўзбекистон мусулмонлар идорасининг расмий сайтида унинг ишдан олинганига оид хабар йўқ. Сайт қидирув хизмати "Одилхон қори Юнусхон ўғли" деган сўровга унинг "Гўзал хулқимиз билан ибрат бўлайлик", деган мавзудаги маъвизасининг видеоёзувини чиқариб бермоқда.

Куни кеча баъзи Интернет нашрлар Одилхон қори Юнусхон ўғлининг "номуносиб хулқи" ҳақида мақола ёритган эди.

kun.uzга кўра, Одилхон қори Юнусхон ўғли ўз фаолиятини 1998 - 1999 йилларда Тошкент шаҳар Учтепа туманидаги “Ҳазрати Умар” жомеъ масжидида имом – хатиб вазифасидан бошлаган. 1999 - 2000 йилларда Шайхонтоҳур туманидаги “Шайх Зайниддин” жомеъ масжидида имом ноиби вазифасида ишлаган. 2010 йилдан буён Тошкент шаҳар бош имом - хатиби ўринбосари. 2011 йилдан буён Шайхонтоҳур тумани бош имом хатиби ва “Шайх Зайниддин” жомеъ масжиди имом – хатиби бўлиб ишлаб келаётган эди.

Одилхон қори Юнусхон ўғлининг “Озодалик имоннинг гўзал баҳоси”, “Масжид одоблари”, “Рўза тутиш одоблари”, “Ҳаж маносиклари”, “Исрофдан сақланайлик”, “Меҳр - оқибат жаннат гаровидир” номли рисолалари чоп этилган. Унинг энг машҳур китоблари “Кибрдан сақланайлик”, “Жаннат калити”, “Қўшничилик ҳақлари ва одоблари” ҳисобланади.

Ҳозирда унинг ташаббуси ва раҳбарлиги остида Muxlis.uz сайти фаолият юритиб келмоқда.
#ozodlik#uzbekistan

2017 йили Ўзбекистон Украинадан 2000 та автомат ва пистолет-пулемёт харид қилган.

Бу ҳақда Украина давлат экспорт назорати хизматининг (УДЭНХ) қуроллар баъзи турлари халқаро савдосининг 2017 йилги якунлари тўғрисидаги ҳисоботига таяниб ru.slovoidilo.ua аналитик портали хабар қилди.

2017 йили Ўзбекистон Украинадан автомат ва пистолет-пулемётлардан ташқари қурол-аслаҳанинг енгил турларини ҳам сотиб олган. Бироқ хабарда бу ҳақда конкрет рақам келтирилмаган. Ўртача калибрли ўқ отар қуроллар ҳамда портловчи аслаҳалар енгил қуроллардир.

Сайт хабарига кўра, 2017 йили Украина экспорт шартномаларини бажараркан, Ўзбекистондан ташқари яна 5 давлатга: Таиланд, АҚШ, Иордания, Монголия ва Туркияга қурол-аслаҳа сотган.

Украина 2017 йили ҳаммаси бўлиб неча пуллик қурол экспорт қилганига оид маълумот хабарда келтирилмаган.

#ozodlik#ukraine#uzbekistan

Фан ва олий таълим соҳаси ходимларининг меҳнат ҳақи миқдорини янада ошириш, илмий ва илмий-техник фаолият натижалари жорий этилишини давлат томонидан қўллаб-қувватлаш чора-тадбирлари тўғрисидаги Президент қарори қабул қилинди.

Бу ҳақда хабар қилган Адлия вазирлигига кўра, қарорга мувофиқ:
2018 йил 1 августдан Ўзбекистон Республикаси Фанлар академияси бошқарув аппарати ходимларининг иш ҳақи миқдорини 2 бараварга;

2018 йил 1 сентябрдан илмий-тадқиқот муассасалари муҳандис-техник ходимларининг иш ҳақи миқдори 30 фоиздан 100 фоизгача табақалаштирилган миқдорда оширилади.

Илмий-тадқиқот муассасалари раҳбар ва илмий, муҳандис-техник ходимлари, шунингдек, олий таълим муассасаларининг раҳбар ходимлари ва профессор-ўқитувчилар таркибининг иш ҳақи миқдори қуйидаги икки босқичда оширилади:

2019 йил 1 январдан – 20 фоизга;

2019 йил 1 июлдан – 25 фоизга.

Илмий ва илмий-техник фаолият натижаларини тижоратлаштириш Президент жамғармаси ташкил этилади.

Жамғарманинг асосий вазифаси этиб, жумладан илмий ва илмий-техник фаолият натижаларини жадал ва кенг жорий қилиш этиб белгиланди.
#ozodlik#uzbekistan

18 июлдан Тошкент марказидаги Ислом Каримов кўчасида жойлашган 17 қаватли бинодаги ташкилотларни кўчириш ва бинони бўшатиш жараëни бошланди.

Ўтган ой айни кўчадаги янги қурилган уч қаватли бинога кўчишни бошлаган Тошкент шаҳар ҳокимлиги бошқаруви янги офисга тўлиқ ўрнашмай туриб¸ 90-йиллар охирида Давлат Мулк қўмитаси учун қурилган 17 қаватли қўшни бино ҳам ҳокимлик тасарруфига ўтмоқда.

Давлат рақобат қўмитаси биносида жойлашган ташкилот ва муассасалар ходимларидан айримлари Озодликка ҳуқуқий-норматив ҳужжат бўлмаган ҳолда¸ ўзларини кўчишга мажбурлашаëтганини шикоят қилди.​ Тошкентдаги энг баланд иморатлардан бўлган бу бинода¸ Озодликка маълум қилишларича¸ собиқ Давлат Мулк қўмитаси (ҳозирги номи Хусусийлаштирилган корхоналарга кўмаклашиш ва рақобатни ривожлантириш давлат қўмитаси¸ қисқа шакли Давлат рақобат қўмитаси)дан ​ташқари¸ Саноатқурилиш банки минтақавий филиали¸ Сиëсий тадқиқотлар маркази каби бошқа ташкилотлар ҳам жойлашган.

Қурилиши бошланган Tashkent City қаршисида жойлашган бу бинодан чиқиш буюрилганлар¸ Тошкент янги ҳокими Жаҳонгир Ортиқхўжаевни ўз ваколатидан фойдаланиб¸ 500 дан ошиқ одамни сарсон қилаëтганликда айбламоқда. Бу эътирозларга жавоб берган ҳоким вакили эса¸ Рақобат қўмитаси балансидаги бинонинг Тошкент шаҳар ҳокимлигига берилаëтганига Ортиқхўжаевнинг алоқаси йўқлиги¸ бундай кўчиш¸ “аҳолига қулайлик яратиш мақсадида” Вазирлар Маҳкамаси ташаббуси билан амалга ошаëтганини билдирди.

Эътироз

Ислом Каримов кўчасидаги Давлат рақобат қўмитаси биносида ишлаб келаëтган қўмита¸ банк ва марказ ходимларидан айримлари Озодликка ҳуқуқий-норматив ҳужжат бўлмаган ҳолда¸ ўзларини кўчишга мажбурлашаëтганини билдирди. “Ҳеч кимнинг қўлида бирор ҳужжат йўқ¸ қаерга¸ нима учун кўчишимиз кераклиги ҳақида ëзма қарор ëки тушунтириш ҳам йўқ. Ўтган ой бу бинони шаҳар ҳокими оларкан¸ шунга кўчишга тайëр бўп туринглар дейишди. Кечадан мана кўчирувчилар келиб¸ пастки қаватларни бўшатишни бошлашди”¸ - деди 19 июль куни Озодликка гапирган 17 қаватлик бинодаги ташкилотлардан бири ходимаси.

:Сиз ўзингизни ош устаси деб ҳисоблайсизми? Унда мана буни кўринг. 17 хил ёғдан тайёрланаётган ўзбек оши. Балиқ ёғига бало борми?#ozodlik #uzbekistan

Савицкий номидаги Давлат санъат музейида (Нукус шаҳри) сувда ивиб, сифатига катта зарар етган асарни "реставрация қилиш ва олдинги ҳолатига тўлиқ қайтариш имкони» изланмоқда.​ Бу ҳақда Озодликка Қорақалпоғистон прокуратураси вакили маълум қилди.

Музей раҳбарияти асар тикланади деди аммо?

Савицкий номидаги Давлат санъат музейи рангтасвир бўлими раҳбари Озодлик билан 20 июль кунги суҳбатда¸ музей маъмурияти зарар етган асарни қайта тиклаш учун юқори малакали мутахассислар билан музокара ўтказаëтганлигини айтди. 19 июль куни воқеани ўрганган Қорақалпоғистон прокуратураси вакилига кўра¸ «асарни реставрация қилиш ва тўлиқ олдинги ҳолатига қайтариш имкони изланмоқда». Озодлик тасарруфида мавжуд бўлган прокуратура ҳужжатига кўра¸ «жорий йил 16 июлга ўтар тунда, И.В.Савицкий номидаги Давлат санъат музейининг 2- блок, экспозиция залида ёнғинга қарши сигнализацияси ўзидан-ўзи ишлаб кетиши оқибатида сув пуркагичдан сув сачраб, деворда осилиб турган Шевченко мўйқаламига мансуб бўлган «Челак кўтарган аëл» («Женщина с ведрами» 1914 й.) асарига зарар етказилган». Ҳужжатда айтилишича¸ асар 6 соат давомида сув босими остида турган.

19 июль куни Озодлик суҳбатлашган мутаҳассилар "асар тиклаб бўлмас ҳолга келганини" айтишган эди.

Савицкий номидаги Давлат санъат музейи рангтасвир бўлими раҳбарининг Озодликка билдиришича, асарни реставрация қилиш ва тўлиқ олдинги ҳолатига қайтариш имкони мавжуд.

Озодлик суҳбатлашган Швейцария¸ Канада ва Франциядаги санъатшунослар «асарни реставрация қилишга шошилмаслик» кераклигини алоҳида таъкидлашди.

Швейцариядаги Alerte Héritage ташкилоти Бош котиби¸ санъатшунослик фанлари доктори¸ профессор Светлана Горшенинанинг Озодликка 20 июль куни билдиришича¸ «тонгги тўртдан то эрталабки ўнгача олти соат сув остида қолган асарни таъмирлашга шошмаслик» зарур

ОҚОЛТИН. "Сирдарё вилояти Оқолтин туманидаги фермерлар номидан мактуб йўлламоқдамиз. Чўл ҳудудига шоли эккан "авторитет" салкам 420 гектар пахта майдонимизни сувсиз қолдирди. Канал сувидан зўравонларча фойдаланади, бизнинг умримиз эса сув ёқалашу авторитет билан ёқалашишда ўтмоқда..." #ozodlik#uzbekistan#sirdaryo#oqoltin

ҚАШҚАДАРЁ – "Таллимаржон ИЭС ишчилари: уйимиз кимошдига қўйилди – кўчада қоляпмиз!.."
НИШОН. "Қашқадарё вилояти Нишон туманидаги Таллимаржон иссиқлик электр станцияси (ИЭС) ишчилари номидан мурожаат йўлламоқдамиз. Узоқ йиллар давомида мазкур станцияда меҳнат қилганимиз боис бизга корхонамиз касаба уюшмаси қарори билан хизмат квартиралари берилган эди. Тошкентдан 2018 йил 6 июлда юборилган 515-сонли қарорга кўра, яшаб турган уйларимиз икки ҳафта ичида кимошди савдосига қўйилар экан. Бизларнинг бирортамизда квартирани кимошдидан сотиб олиш учун пул йўқ. Ваҳоланки, ушбу уйлар Ислом Каримов даврида ишчилар учун корхонамиз маблағига қурилган эди. Кун келиб кўчада қолишимиз мумкинлиги бирортамизнинг хаёлимизга ҳам келмаган эди. Мана, энди ҳалол меҳнати билан корхона равнақига баҳолиқудрат ҳисса қўшган инсонлар ҳайдаб чиқарилиб, уйлар пулланмоқда.

Квартираларни кимошдига қўйиш қарори чиқдию пичоқ бориб суякка қадалди.Биз энди нима қилайлик?! Тасаввур қиляпсизми, ҳозир нечта оила ғамга ботиб ўтирганини?! Ҳа, қорни тўқнинг қорни оч билан, уйлининг уйсиз билан иши йўқ экан!

Талимаржон ИЭС директори иш фаолияти даврида элдан олган қарғиш етти авлодига етади. Корхонага тегишли бўш ётган меҳмонхоналар, қуриб битказилмаган ўнлаб коттежлар қолиб, ходимлар яшаб турган уйларни аукцион рўйхатига ёзди-я!

Охирги икки йилда станциямизда фақат кўнгилни чўктирувчи, умидни сўндирувчи ўзгаришлар бўлмоқда. “Оптималлаштириш” баҳонаси билан 500 дан ортиқ киши ишсиз қолди. Шулардан 3-4 болали аёллар Туркия ва Россияга ишга кетди. Ойлик маош қисқартирилди. Ҳозирги жазирама кунларда ҳам миқ этмай пахта даласида ишлаяпмиз. “Ўз хоҳишимиз билан”! Корхонамиздаги носоғлом муҳитни эса юқори раҳбарлар аралашмаса бартараф этиш қийин.

Биз кўчада қолмоқдамиз. Ёрдам бериши керак бўлган раҳбариятнинг эса парвойи палак. Бошимиз қотган. Тошкентдан – марказий раҳбариятдан мушкулимизни осон қилишларини сўраймиз".#ozodlik#uzbekistan#qashqadaryo

​"Биз бир неча йилдан бери Ўзбекистондан Россияга ўз автомашинамизда қатнаймиз. Россиянинг турли шаҳарларида ишлаётган ўзбекистонлик юртдошларимиз уйларига жўнатаётган юкларини олиб келиб берар эдик. Яъни почта вазифасини бажарар эдик. Лекин жорий йил 1 июлдан Ўзбекистонга юк олиб кириш тақиқлангани сабаб биз ҳайдовчилар уйимизга кетолмай қолдик. Ахир, юк йиғиб, ҳам йўл пулини чиқаришимиз, ҳам рўзғорга уч-тўрт сўм орттириб боришимиз керак. Ушбу тақиқдан кейин нима қилишни билмай қолдик. Бутун тирикчилигимиз шу ишдан эди-да.

Биз одамларнинг узоғини яқин, оғирини енгил қилар эдик. Бировга халал ҳам бермагандик. Президентимиздан тақиқни бекор қилиб, биз каби ўнлаб ҳайдовчиларнинг тирикчилик қилишига яна имкон беришини сўраб қоламиз". #ozodlik#uzbekistan#russia

ЎЗБЕКИСТОН ТУМАНИ. "Фарғона вилояти Ўзбекистон тумани боғча мудиралари номидан ёзмоқдамиз. Туман мактабгача таълим бўлими раҳбарининг "шарофати" билан боғчалардаги болалар оч қолмоқда. Бир неча ойдан бери боғчаларга мева-чева, 15 кундан бери эса сут маҳсулотлари берилгани йўқ. Боғчалар захира эвазига овқат пишириб келмоқда. Таъминотчиларга уч ойдан буён олинган маҳсулот пули ўтказиб берилмаяпти.

Туман мактабгача таълим бўлими раҳбари бўлган аёл 2018 йил май ойида республика ишчи гуруҳининг ўрганишларидан кейин ўз лавозимидан озод этилган эди. Аммо билишимизча, у ҳамон яширинча бўлим мудири лавозимида ишлаб келмоқда. Биз – Ўзбекистон туманидаги мудиралар, боғчалар учун озиқ-овқат таъминоти тез фурсатда йўлга қўйилишини сўраймиз". #ozodlik#uzbekistan#ferghana

​МУБОРАК. "Ўзбекнефтгаз" компаниясига қарашли Муборак газни қайта ишлаш заводи (МГҚИЗ) ишчилари номидан ёзмоқдаман. Аввалроқ завод раҳбарияти бизни мукофот пулидан маҳрум қилгани, шу боис кредитни тўлай олмай қолганимиз ҳақида мактуб йўллаган эдик. Афсуски, ушбу мактуб чоп этилганидан кейин ҳам вазият яхши томонга ўзгармади, раҳбарият ҳамон бизнинг қонуний талабларимизни бажармаяпти. Дейлик, бир миллион сўм ойлик оламиз, аммо кредитга бир ярим миллион сўм тўлашимиз керак. Уйда эса "ейман, ичаман" деган фарзандларимиз бор. Қисқаси, жуда оғир аҳволда қолдик. Моддий танглик саломатликка ҳам таъсир этади. Яқинда бизни тиббий кўрикдан ўтказишди. Кўплаб ҳамкасбларимизнинг қонида гепатит борлиги маълум бўлди. Зарарли ва заҳарли шароитда ишлаганимиздан кейин, бизни ижтимоий ҳимоялаш ва саломатлигимизни муҳофаза қилишга эътибор қаратилмаганидан кейин шундай бўлади-да! Биз завод раҳбариятидан ойлик маошимизни ошириш ва муносиб меҳнат шароити яратишни талаб қиламиз". #ozodliK#uzbekistan#qashqadaryo#muborak

Андижон вилоят, Андижон туманида яшайдиган фуқаро 19 июль куни уйига қарз ундиришга келган Мажбурий ижро бюро ходимини пичоқлади.

Орқасидан иккита пичоқ жароҳати олган МИБ ходими касалхонага ётқизилган. Андижон шаҳар шошилинч тиббий ёрдам касалхонасидан Озодлик олган маълумотга кўра, ходимнинг аҳволи ўртача оғир, деб баҳоланмоқда.​ Андижон туман ички ишлар бўлими мулозими шундай вқоеа бўлганини тасдиқлади ва МИБ ходимига тан жароҳати етказишда гумонланган шахс устидан жиноят иши очилганини маълум қилди.

Андижон тумани Бўтақора қишлоғида яшайдиган, ўзининг "Дамас" машинасида киракашлик билан шуғулланадиган Ёдгор Охунов 19 июль куни унинг уйига қарз ундиришга келган МИБ ходими Баҳромни (МИБ ходими фамилиясини аниқлаш имкони бўлмади – таҳр.) пичоқлаганликда гумонланиб ҳибсга олинган.

Бу хабарни тасдиқлаган Андижон туман ички ишлар бўлимининг ўзини таништирмаган мулозимига кўра, қасддан баданга оғир шикаст етказишда айбланаётган шахсга нисбатан Ўзбекистон Жиноят кодексининг 104-моддаси билан жиноят иши қўзғатилган.

Мулозим бу ҳақда бошқа маълумот беролмаслигини айтди.

Воқеага гувоҳ бўлган Бўтақора қишлоғи маҳалла фаолларидан бирининг Озодликка айтишича, МИБ ходими электрдан бўлган қарзини ундириш мақсадида Ёдгор Охуновнинг уйига келган: “Ёдгорнинг электрдан 500 минг сўм қарзи борлиги учун уйини бир ҳафтача олдин электрдан узиб кетишган эди. 19 июль куни кечга яқин Баҳром деган МИБ ходими ундан қарзини ундиришга келган. Баҳром уйида бўлмаган, МИБ ходими билан жанжал бўлганидан сўнг, хотини уни телефон қилиб чақирган. Баҳром жанжалнинг устига етиб келган ва МИБ ходими билан сану-манга борган. Баҳром МИБ ходимига икки марта орқасидан пичоқ санчиб олган. Биз борганда МИБ ходимини қўни-қўшнилар ўзларининг машинасида касалхонага олиб кетишган экан. Кейин милиция келди, Баҳромга наручник солиб олиб кетишди”, дейди маҳалла фаоли.

Андижон шаҳар шошилинч тиббий ёрдам касалхонасидан Озодлик олган маълумотга кўра, 19 июль куни кечқурун пичоқланган МИБ ходимига жарроҳлик амалиёти ўтказилган. Врачлар унинг аҳволини ўртача оғир, деб баҳоламоқда.

Ўзбекистонда аҳолининг МИБ ходимлари билан қарздорлик масаласида жанжаллар бўлиб туради.

Оқ Уй матбуот котиби Сара Сандерс маълум қилишича, АҚШ президенти Дональд Трамп маъмурияти ходимларига жорий йил кузида Россия президенти Владамир Путинни Вашингтонга таклиф қилиш тўғрисида топшириқ берган.

Унинг 19 июль куни Твиттерда ёзишича, “Трамп Ҳельсинкида икки мамлакат хавфсизлик кенгашлари амалий мулоқоти давом эттирилишига розилик берди”. Ўша куни Трамп 16 июль куни Путин билан учрашувини “улкан муваффақият”, деб мақтади. Яна у Ҳельсинкидаги муҳокама қилинган айрим ғояларни амалга ошириш учун “иккинчи учрашувимизни сабрсизлик билан кутяпман”, деб ҳам айтди.

У 19 июлда Твиттерда қолдирган изоҳларида Путин билан учрашувининг ОАВда ёритилишини танқид қилди. “Россия билан саммит улкан муваффақиятимиз бўлди, буни сохта хабар тарқатувчи ОАВ – одамларнинг ҳақиқий душмани кўра олмади”, деб ёзди у.

Путиннинг Америка Қўшма Штатларига бўлажак сафари ҳақидаги Оқ Уйнинг хабари АҚШ Миллий разведка хизмати директори Дэн Коатсни ҳайрон қолдирди. У бу хабарни Колорадо штатининг Аспен шаҳрида хавфсизлик бўйича ўтказилаётган форум вақтида теледастурдан эшитганини айтди.

Трамп билан Путиннинг фақат таржимонлар иштирок этган яккама-якка учрашуви чоғида муҳокама қилинган нарсалар тафсилоти энди-энди маълум бўлмоқда. ‒ Мен учрашув чоғида нима гаплар бўлганини билмайман, ‒ деган эди Коатс олдинроқ Аспен форумида.

Москвада учрашув ҳақида гапирган Путин ҳам уни “тўла муваффақиятли ўтди”, “баъзи фойдали келишувларга эришилди” деди, аммо тафсилотларини очиқламади.

Франс-Пресс агентлиги Путиннинг Москвада сўзлаган нутқидан иқтибос келтириб ёзишича, у Трампнинг Қўшма Штатлардаги танқидчиларини “аянчли ва ночор кимсалар” деб атаган.

Трамп АҚШ парламенти аъзолари, ҳатто етакчи партиядошлари ҳам унинг Ҳельсинки учрашувидан сўнгги матбуот конференциясида сўзлаган нутқини танқид қилиб чиқди.

Кўплаб танқидчилар Путин билан Трампнинг яккама-якка учрашуви келишувлари ёзиб олинмаганидан шикоят қилди.

Трамп президент сайлови кампанияси вақтида ҳам, президентлик даврида ҳам Россия, хусусан, Путин билан алоқаларни яхшилашга интилаётганини айтиб келади.#ozodlik

Тожикистон ва Ӯзбекистон Қурилиш ва архитектура давлат қӯмиталари икки мамлакат ҳудудида 4 мактаб ва шифохона қуриш тўғрисида битим лойиҳасини тайёрлади.

Тожикистон Қурилиш ва архитектура давлат қӯмитаси маълумотига кӯра, мазкур битим келгуси ой Тожикистон президенти Имомали Раҳмонинг Ӯзбекистонга давлат ташрифи чоғида имзоланиши кутилмоқда.

19 июль куни Душанбеда бўлиб ўтган матбуот анжуманида Тожикистон Қурилиш ва архитектура давлат қӯмитаси раиси Жамшед Аҳмадзода Ӯзбекистон билан икки давлат ҳудудларида мактаб ва шифохона қурилиши борасида келишувга эришилганини айтди. “Ушбу келишув асосида Тожикистон ўз маблағи ҳисобига Самарқанд шаҳрида 640 ӯринли тожик мактаб ва Фарғона вилоятида 300 ӯринли мактабгача таълим муассасасини қуриб беради. Ӯзбекистон эса Тожикистон шимолидаги Спитамен туманида 630 ӯринли ӯзбек мактаб ва мамлакат жанубидаги Хатлон вилояти, Қубодиён туманида 200 ётоқ ӯрнига мӯлжалланган тиббий мажмуа қуриб беради," - деди Жамшед Аҳмадзода.

Унинг қӯшимча қилишича, Тожикистон ва Ӯзбекистон Қурилиш ва архитектура давлат қӯмиталари мазкур объектлар қурилиши учун зарур ер участкаси ажратиш каби барча масалаларни муҳокама қилиб, қурилиш борасидаги битим лойиҳасини тайёрлаган.

Жамшед Аҳмадзоданинг таъкидлашича, жорий йилнинг августига мӯлжалланган Тожикистон президенти Имомали Раҳмоннинг Ӯзбекистонга давлат ташрифи чоғида мазкур битим имзоланиши кутилмоқда.

Айтилишича, Тожикистон ва Ӯзбекистон томонлари мазкур иншоотлар қурилишига ёрдам беради.

Жумладан, ишларни бажариш ва хизмат кўрсатиш учун ушбу давлатлар ташкилотлари ҳамда фуқароларини жалб этиш масаласида кўмаклашади.

Жорий йил март ойида Ӯзбекистон президенти Шавкат Мирзиёевнинг Тожикистонга давлат ташрифи чоғида икки давлат Қурилиш ва архитектура давлат қӯмиталари орасида ҳамкорлик битими имзоланганди.

Президент Шавкат Мирзиёев Ядро физикаси институтида Фанлар академияси ва илмий-тадқиқот институтлари вакиллари, академиклар, олимлар, ёш тадқиқотчилар билан мулоқот қилди.

Бу ҳақда хабар қилган president.uz расмий сайтининг ёзишича, кейинги бир йилда Президент соҳага доир 11 фармон ва қарори қабул қилган, лекин фан билан ишлаб чиқариш ўртасидаги интеграция паст даражада қолаётгани, илмий изланишлар етарлича қўллаб-қувватланмаётгани танқид қилинган. «Ҳар бир илмий ишга маҳсулот сифатида қаралиши, унинг харидори олдиндан аниқ бўлиши керак», деган Шавкат Мирзиёев.

Давлатз раҳбари илмий ишланмаларнинг амалиётга тадбиқ этилишини қўллаб-қувватлаш учун 100 миллион доллар грант ажратилиши, илмий-тадқиқот институтлари ходимларининг ойлик маошлари бир неча баробар оширилишини маълум қилган.

#ozodlik#uzbekistan

КАТТАҚЎРҒОН. "Самарқанд вилояти Каттақўрғон шаҳридан ёзмоқдаман. Шаҳримиздаги тўрт асрлик Абдуҳакимбой мадрасасининг бугунги аҳволини кўринг. Бебаҳо мерос сифатида сифатида рўйхатга олинган обидани нопок "тадбиркорлар" эгаллаб олган. Аччиқ бўлса-да айтиш керак, мўътабар тарихий маскан бугун пиёнисталар маконига айланган. Бу масалада Президент виртуал қабулхонасига, Маданий меросни асрашга масъул ташкилотларга мурожаат қилдик. Аммо фойдаси йўқ. Ачинарли жиҳати, тарихий обидани ҳимоя қилишга уринганимиз учун айрим идоралар бизга таҳдид ҳам қилди. Ушбу ҳудудга сектор раҳбари сифатида Каттақўрғон шаҳри прокурори масъул саналади. Аммо прокурор ҳам ушбу шармандаликни била туриб билмасликка олмоқда, дангалини айтсак, кўзини кўр, қулоғини кар қилиб олган. Мазкур ҳолатдан Ўзбекистон Мусулмонлари диний идораси ҳам хабардор. Масъул ташкилотлардан тарихий обидани муносиб даражада муҳофаза этишларини сўраймиз".​ #ozodlik#uzbekistan#samarkand

Most Popular Instagram Hashtags