#وصفات_نوره

178 posts

TOP POSTS

زربيان عدني بطريقة فروحة الامارات
نصف كيلو لحم بعظم(او الكميه اللي تشوفينها مناسبه لكم)ممكن استبداله بالدجاج
بهارات صحيحه(هيل ومسمار وقرفه وفلفل اسود وكمون)
ملح
زيت نباتي
بصله كبيره مقطعه جوانح
٤ فصوص ثوم مدقوق
قطعه صغيره زنجبيل مفروم
علبة زبادي
بطاطس مقطع مكعبات وسط
ملعقه كبيره معجون طماطم
ملعقه صغيره كركم
ربع ملعقه صغيره فلفل احمر حار
ملعقه صغيره بهارات لحم
قطعه صغيره فحم لتبخير الرز
ماء كادي منقوع فيه زعفران
كوبين رز مغسول ومنقوع
الطريقه:
يسلق اللحم مع البهارات الصحيحه ونملحه اذا استوى
نحمس البصل لين يصير لون ذهبي غامق ونشيل كميه بسيطه للتزيين بعدين نضيف الزنجبيل والثوم ونقلبهم لين تطلع الريحه بعدين نحطها في الخلاط مع علبة زبادي
نحمس البطاطس مع اللحم بس شوي بعدين نضيف خليط الزبادي والبصل والكركم والملح والفلفل الاحمر وبهارات اللحم ومعجون الطماطم ونقلبهم بعديم نغطيه ونتركه هلى نار هاديه ربع ساعه
نسلق الرز ثلاث ارباع استواء بمرق اللحم
نضيف الرز على اللحم ونضيف ماء الكادي والزعفران ونغطي القدر ونتركه على نار هاديه ٢٠ دقيقه او لين يستوي الرز
تكونين مولعه الفحم وتحطين صحن عميق في وسط الرز وفيه قليل زيت بعدين تحطين الفحم في الزيت وتغطين القدر وتتركينه ١٠ دقايق لين ياخذ نكهة التبخير..
يقدم في طبق ويزين بالبصل المقرمش والبقدونس المفروم وممكن اضافة بعض المكسرات والبيض
#وصفات_نوره #زربيان_لحم #زربيان #زربيان_عدني #زربيان_دجاج

مراصيع(مصابيب)
المقادير:
٣ اكواب دقيق بر
ملعقه كبيره خميره
ملعقه كبيره بيكنج باودر
ملعقتين كبيره سكر
نص ملعقه صغيره ملح
بيضه كبيره
ملعقه صغيره فانيلا
٣ ملاعق كبيره حليب بودره
٤ اكواب ماء دافي(ممكن تحتاجين ربع كوب زياده)
نص كوب زيت
الطريقه:
نخلط جميع المقادير في الخلاط الكاس واذا الخلاط صغير اخلطيها بالمضرب اليدوي جميع المكونات ماعدا الدقيق واذا تجانست نضيف الدقيق ونكمل خلط..وماتحتاج تخمير(نشتغل فيها على طول) وراح يكون قواها شبه سائل
نحط الصاج على نار هاديه ونبدأ نصب الخليط بملعقة الاكل واذا حمرت من تحت نقلبها تحمر من الجهه الثانيه..
نرتبها في صحن التقديم ونحط عليها زبده وعسل او سمن وعسل او قشطه وعسل او نوتيلا او لبنه وزعتر.
وبالعافيه
#مراصيع #مصابيب #وصفات_نوره

داوود باشا:
للكفته/
نصف كيلو تقريباً لحم مفروم طازج
حبه كبيره بصل مفروم ناعم
ملح وفلفل اسود وقرفه وبهار حلو(اختياري)
للصلصه/
حبتين طماطم وسط مبشوره
(نقطعها بالعرض بالنص والوجه المقطوع
هو اللي نحطه ع المبشره ونبشر لين يبقى
القشره فقط)
بصل وسط مفروم
نص علبه معجون طماطم
٣ ملاعق كبيره دبس رمان وممكن تزيدين حسب الرغبه
ملح وفلفل اسود وقرفه وبهار حلو(اختياري)
الطريقه:
نخلط مكونات الكفته ونكورها مع استخدام الزيت
اثناء التكوير(تقريبا سويت ٢٥ حبه)
ونشوحها في الزيت ونطلعها على جنب..
الصلصه/نحمس البصل في نفس الزيت ونضيف
له الطماطم ومعجون الطماطم والدبس والبهارات
ونص كاس مويه تقريبا.نتركها تغلي لين تتسبك
ونضيف الكفته ونقلبها ونغطي عليها ١٠ دقايق
تكمل استواء ويثقل الصوص.
نحطها بصحن التقديم ونزينها بصنوبر محمص
وبقدونس..ونقدمها مع رز بالشعيريه.
وبالعافيه
#وصفات_نوره #داوود_باشا #كفته #كفته_لحم

خبز عروق بالخضار او الباكوره الهنديه
٢ كوسه مبشوره
ورقه كبيره كرنب مفروم
نص حزمه مفرومه كل من(بقدونس وشبت وكزبره)
عود كبير بصل اخضر مفروم
١ بصل متوسط مفروم
فلفل اخضر حار مفروم(اختياري)
١ كوب دقيق حمص
نصف كوب دقيق ابيض
ملعقه صغيره خميره فوريه
كوب ماء دافيء
بيضه
ملح حسب الرغبه
نصف ملعقه صغيره كل من(فلفل اسود/كمون/كزبره ناشفه وكاري)
ممكن اضافه جزر مبشور و لحم مفروم
الطريقه:
اخلط جميع المكونات بالمضرب اليدوي ماعدا الخضار والورقيات نضيفها بعد الخلط ..نغطي الخليط لمدة نصف ساعه وبعدها نشكل الخليط بواسطة ملعقة الاكل في زيت غزير على حراره وسط الى عاليه عشان ماتتشرب زيت..ونقلبها لين تاخذ اللون الاشقر الغامق..
وتقدم مع زبادي بالثوم والنعناع
#وصفات_نوره #خبز_عروق #باكوره #باكوره_هندية #خبز

بطاطس في الفرن
تقشرين البطاطس وتقطعينه بالشكل اللي تفضلينه وتنقعينه في مويه مغليه لمدة ربع ساعه..بعدين حطيه في الصفايه لين يجف من المويه..وحطي البطاطس في صينيه تيفال او صينيه مبطنه بورق زبده وحطي عليه ملح والتوابل اللي تحبينها..انا حطيت فلفل اسود وكزبره ناشفه وفلفل تركي احمر حار وزيت زيتون وقلبيها لين تتغطى كلها بالتوابل والزيت والملح وافرديها جنب بعض ودخليها الفرن على درجة حراره ٢٠٠ درجه مئويه ويكون شغال من تحت وفوق واتركيه لين يتحمر شوي وبالعافيه
#وصفات_نوره #بطاطس_بالفرن #بطاطس #بطاطس_مشوي

إيدام باميه بالدجاج:
دجاج ٨٠٠ جم مغسول ومنزوع الجلد ومقطع صغير
١ بصل متوسط مفروم
١ فلفل بارد صغير مقطع مكعبات صغيره
١ طماطم متوسط مقشر ومقطع مكعبات صغيره
٢/١ علبه معجون طماطم
ملح وربع ملعقه صغيره كلا من(فلفل اسود وكمون وكزبره ناشفه)
ربع كيلو او اكثر باميه مغسوله ومقمعه
٤ فصوص ثوم مدقوق
٢ ملعقه كبيره كزبره خضراء مفرومه

الطريقه:
اولا:تشوحين الباميه في قليل زيت لين يتغير لونها لأخضر حلو(ما اعرف اوصف اللون)😊وتتركينها على جنب
ثانياً:في قدر تحمسين البصل لين يحمر بعدين تضيفين الفلفل البارد وبعدها الدجاج وقلبيه لين ياخذ لون اشقر خفيف بعدين تضيفين مكعبات الطماطم وتقلبين وبعدها الملح والبهارات ومعجون الطماطم وقلبي ٥دقايق بعدين اضيفي مويه مغليه ماتغطي الدجاج بالكامل واتركيها على النار ١٠ دقايق بعدين اضيفي الباميه المشوحه وقلبيهم مع بعض تمام وغطي القدر واتركيهم بدون تقليب لمدة ثلث ساعه او لين تستوي الباميه.
ممنوع التقليب اثناء الطهي عشان تحافظ الباميه على شكلها وماتتقطع..بعد ماينتهي الايدام وتقفلين النار. شوحي الثوم في زيت لين تطلع ريحته بدون مايتغير لونه بعدين قفلي النار واضيفي الكزبره الخضره وقلبيهم بعدين اضيفيهم على الايدام وقلبي تقليب خفيف جداً جداً جداً وغطي القدر ٥ دقايق عشان عشان ياخذ النكهه..ممكن اضافة قليل عصير ليمون قبل التقديم
يقدم مع ارز ابيض بالشعيريه او بالجزر او بالخضار
وبالعافيه #وصفات_نوره #ايدام #ايدام_باميه #مسبك

الزيت المنكّه/تجيبين زيت زيتون وعادي لو تخلطين معه زيت نباتي..وتحطين عليه ثوم مقطع شرايح وملح وفلفل احمر ناشف مجروش واكليل الجبل(روزماري)مجفف وبهارات ايطاليه.واتركيه على الاقل ساعه.عشان يتشرب الزيت النكهات الموجوده.هذا الزيت تصبين منه على البيتزا عند التقديم يعطي نكهه ولا أروع 👌🏻
#وصفات_نوره #زيت_زيتون #زيت

مونكي بريد/بطريقة مارثا ستيوارت

٣ وربع كوب دقيق
ملعقه كبيره خميره
ملعقه صغيره ملح
ربع كوب سكر/ورشة سكر تحطونها مع الخميره
ربع كوب ماء دافيء
ثلاث ارباع كوب حليب دافيء
بيضه كبيره
ملعقتين زبده بدرجة حرارة الغرفه
وزبده لدهن القالب
للتغطيه:
كوب سكر اسمر/وممكن اكثر
٣ ملاعق صغيره قرفه مطحونه/وممكن اكثر
نصف اصبع زبده مذوبه/وممكن أكثر

الطريقه:
نضع الخميره ورشة السكر في الماء الدافيء
ونحركهم ونتركهم خمس دقايق لين تتفاعل
نخفق الحليب والبيضه والسكر والملح والزبده
نضيف لهم خليط الخميره ونحركهم مع بعض
ونضيف الدقيق بالتدريج لين يتكون عندنا عجينه
ماتتلزق وكل ماطولت مدة العجن كل ماطلعت
العجينه مضبوطه
وغطيها بفوطه مبلله واتركيها عشرين دقيقه
في مكان دافيء.
*العجينه تمام ماتحتاج اي تعديل لازياده ولا نقص

نكورها كور صغيره (بحجم حبة العنب الكبيره)
ممكن تحشونها جبن او مكسرات او شوكولاته
(جالكسي-سنكرس-ساده)حلاوة بقر
تغمسونها في الزبده بعدين في خليط السكر والقرفه
تحطونها في القالب المفتوح من النص فوق بعض
وممكن اضافة الجوز(عين الجمل)بين الكور
بعد ماتنتهين من الكميه غطيها بنايلون واتركيها ساعه
بعدين اخبزيها في الفرن في الرف الوسط
بدرجة حراره ١٨٠ لمدة نصف ساعه
واتركيها تبرد ربع ساعه بعدين اقلبيها في طبق التقديم
وبالعافيه
#وصفات_نوره #مونكي_بريد #مارثا_ستيوارت

حلا المارس بالنسكافيه
القاعده:
٢٥٠ جم بسكوت دايجستف مطحون(١٦ حبه)
٥٠ جم زبده مذوبه(نص قالب)
(نخلطهم ونكبسهم في صحون تقديم فرديه)
الطبقه الاولى:
١٢ حبه جبن كيري
علبه قشطة التاج او اي نوع
ظرف كريم كراميل
ظرفين دريم ويب
نص ملعقه صغيره نسكافيه
(نخلطهم في خلاط الكاس او محضرة الطعام(فرامة البصل) ونحط طبقه فوق البسكوت)وندخلهم الثلاجه لين يبرد ويتماسك
الطبقه الاخيره:
٣ مارس كبير
٣ ملاعق كبيره قشطه
(نذوبهم في حمام مائي او في الميكرويف)ونحطهم فوق الخليط السابق وندخلهم الثلاجه لين وقت التقديم
ويزين بفليك او جالكسي مبشور مع قطع فواكه 👌🏻
#وصفات_نوره #حلا #حلا_المارس #حلى #حلى_المارس

MOST RECENT

كوكيز الشوفان بالزبيب والقرفه
سكر أبيض - ثلاثة أرباع كوب سكر أسمر - ربع كوب
زبدة - نصف كوب + ملعقة صغيرة
بيض - 1
فانيليا - نصف ملعقة صغيرة
دقيق - ثلاثة أرباع كوب
بايكنغ صودا - نصف ملعقة صغيرة
قرفة مطحونة - نصف ملعقة صغيرة
ملح - ربع ملعقة صغيرة
شوفان - كوب ونصف
زبيب أسود - نصف كوب
جوز مفروم - نصف كوب
الطريقه:
1- حمّي الفرن على حرارة 190 درجة مئوية.
2- إدهني صينية فرن بملعقة صغيرة من الزبدة.
3- أخلطي في وعاء الخلاط الكهربائي السكر الأبيض والسكر الأسمر والزبدة حتى تتجانس المكوّنات.
4- أضيفي الفانيليا والبيضة واخفقي جيداً حتى يصبح المزيج خفيفاً ومنتفخاً.
5- ضعي الدقيق والبايكنغ صودا والقرفة والملح واعجني المكونات ثمّ أضيفي الشوفان والزبيب والجوز واخلطي حتى يصبح الخليط متجانساً.
6- شكلي دوائر أو كرات من العجين في الصينية بواسطة ملعقة تاركة 5 سم بين قطع الكوكيز.
7- أدخلي الصينية إلى الفرن واخبزي الكوكيز لمدة 10 دقائق تقريباً حتى يصبح وجهها ذهبياً.
8- أخرجي قطع الكوكيز من الفرن واتركيها تبرد لدقيقة وضعيها في طبق التقديم.
#وصفات_نوره #كوكيز_شوفان #كوكيز #كوكيز_الشوفان #cookies

سلطة المكرونه
نص كيس مكرونه ملونه مسلوقه مع زيت وملح(وتكون بارده)
حبة خيار مقشر ومقطع مكعبات
٤ ورقات كبيره خس مقطع شرايح نحيفه
نص حزمه بقدونس مفروم
نص حزمه كزبره مفرومه
عودين بصل اخضر مفروم
حبه كبيره فلفل بارد اخضر او ملون مقطع صغير
ربع كوب زيتون اخضر شرايح
ربع كوب زيتون اسود شرايح
كوب ذره
كوب فاصوليا حمراء
مقادير الصوص:
ملعقتين كبيره مليانه خردل
ملعقه كبيره مليانه عسل
ملعقتين كبيره زيت زيتون
ملعقه كبيره خل ابيض
فصين ثوم مهروس
عصير ليمونه كبيره
ملح وفلفل اسود وتوابل ايطاليه
الطريقه:
نقلب الخضار ونحط عليها المكرونه ونقلبها ونخلط مقادير الصوص لين تتجانس بعدين نضيفه للسلطه ونقلبها ونحطها بصحن التقديم وبالعافيه
#وصفات_نوره #سلطه #سلطة #سلطات #سلطة_مكرونة #سلطة_مكرونه #سلطة_باستا #مكرونه #باستا #مقبلات

#سمبوسة_لحم و #لقيمات 🙅🏻💕💕 وش فطوركم اليوم 👀💜 ؟؟؟

#اللقيمات 😍😍😍 ضبطت ماشاء الله واخييراً

رز بخاري بطريقة الشيف منى قبوري
ثلاث اكواب رز مزه او بسمتي ينقع لمدة نصف ساعه مع رشة ملح ورشة خل
دجاجه مقطعه نصين او ارباع
3 جزرات مقطعه بشكل رفيع(اعواد)
4 بصلات كبار مفرومه
ملعقة ثوم مفروم
4 طماطم كبيره مفرومه ناعم(انا اقشرها)
ملعقة اكل مليانه معجون طماطم
ملعقتين صغار كل من(كزبره وكمون وفلفل اسود وهيل) مطحونين
ملعقه صغيره قرفه مطحونه
ملعقه صغيره فلفل احمر مجروش
ملعقة اكل ملح
ثلاث ارباع كوب حمص بليله مسلوق
نص كوب زبيب
فلفل اخضر او احمر حار(للنكهه فقط)
لوز وصنوبر مقليين للتزيين
الطريقه:
يسخن زيت في قدر ويقلب البصل حتى يحمر لونه(اخذت كميه بسيطه للتزيين) ثم يضاف الطماطم والثوم ويقلب حتى تذوب الطماطم ثم نضيف معجون الطماطم والبهارات والملح ويقلب ثم يضاف الدجاج ونصف كمية الجزر ويقلب قليلاً ثم نضيف ماء مغلي يكفي للرز..ثم نغطيه ونتركه اربعين دقيقه على نار هاديه.نرفع الدجاج لصينية فرن وندهن الوجه بمعجون طماطم وندخله الفرن للتحمير..نضيف للمرق (الرز بعد تصفيته والزبيب والحمص وباقي كمية الجزر والفلفل الاخضر الحار)ونعدل الملح ونشوف اذا يحتاج زيادة مويه ونتركه على نار عاليه خمس دقايق وهو يغلي وبعدها نغطيه ونتركه على نار هاديه لين يستوي الرز ويتفلفل..نغرفه في طبق التقديم ونحط فوقه الدجاج ونزينه بالبصل المحمر واللوز والصنوبر..وبالعافيه
@munaqubori
#وصفات_نوره #رز #رز_بخاري #كبسه #عزايم #رز_برياني #برياني #بخاري #بخاري_لحم #بخاري_دجاج

كيكة جوز الهند
المقادير
بيضتين
ثلاث ارباع كوب سكر ابيض
ملعقه صغيره فانيلا سائله
نص كوب زيت
نص كوب حليب مبخر مثل المراعي او بوني او ابو قوس
كوب دقيق منخول
نص كوب جوز هند
ملعقه كبيره بيكنج باودر
ربع ملعقه كبيره بيكنج صودا(بيكربونات الصوديوم)
لقاع الصينية // ملعقة كبيرة زبدة نص ملعقة صغيرة قرفة مطحونه ٢ ملعقه كبيره سكر اسمر غامق نص كوب جوز هند رطب محلى مبشور خشن(ممكن استبداله بجوز الهند العادي)
الطريقة:
نخفق البيض مع السكر والفانيليا لين يصير فاتح بعدين نضيف الزيت وبعده الحليب وبالاخير نضيف الدقيق مع جوز الهند والبيكنج بنوعيه
ندهن القالب بالزبده
نذوب الزبده ونضيف السكر الاسمر ونتاكد من ذوبانه بعدها نضيف القرفه والجوز هند الرطب ونقلب مع بعض ونضعه في القالب طبقه اولى وبعدها خليط الكيك وندخلها الفرن على حرارة ١٨٠ وتترك الى ان تستوي الكيكه(تقريباً نص ساعه) بعد ما نطلعها من الفرن نتركها تبرد شوي بعدين نقلبها ونزينهت بخطوط من الشوكولاته(استخدمت النوتيلا) تقلب وتزين بأي شوكولاته انا حطيت نوتيلا
#وصفات_نوره #كيك #كيكه #كيكة_جوز_الهند #جوز_الهند #حلى #حلا

صوص المايونيز/
٣ ملاعق كبيره مايونيز
٥ اعواد بصل اخضر(الجزء الاخضر)مفروم
ملعقتين كبيره بقدونس مفروم
٣ فصوص ثوم
(الثوم والبصل والبقدونس ندقهم مع بعض
لين يتكون خليط مهروس)
ملعقه كبيره كزبره مفرومه
ملعقه كبيره عصير ليمون
ملح وفلفل اسود او ابيض
تخلط كل المقادير مع بعض لين تتجانس
*تقدم مع الكفته او السمك او لدهن الساندويتش
وبالعافيه
#وصفات_نوره #مايونيز #صلصه #صوص

ساندويتش كفتة لحم مع صلصة المايونيز اللذيذه 👌🏻
المقدار يكفي من 4 الى 5 ساندويتشات
مقادير الكفته:
250 جم لحم مفروم(دهن قليل)
بصله متوسطه مفرومه
ربع حزمه بقدونس مفروم
رشه كل من(ملح وفلفل اسود وقرفه وبهار حلو)
الطريقه:
نخلط جميع المكونات باليد وبعدين نسويها 4 او 5 كور متساويه
بعدين نضغطها بشويش مع مراعاة انه الاطراف تكون متماسكه ونضغط عليها عشان ماتنفتح لين يتكون عندنا اقراص(نفس شكل لحم البرقر)
ممكن بعد هذي الخطوه نفرزنها ونحط بين القطع ورق زبده او ورق مشمع او نايلون
او نبدأ في تشويحها..نحط قليل زيت في صاج تيفال ونحط قطع الكفته ونتركها خمس دقايق لين تتحمر من تحت بعدين نقلبها ع الوجه الثاني ونتركها خمس دقايق ثانيه..
ناخذ الخبز الدائري (خبز البرقر) ونحط الجهه الداخليه منه على الصاج في نفس الزيت اللي شوحنا فيه الكفته..بس نبغاه ياخذ نكهه ويتشوح شوي..
بعدين ندهن الخبز بصلصة المايونيز ونحط فوقها خس وطماطم او اي اضافه تحبينها..وبعدها نضيف الكفته وفوقها قطعة جبن شرايح ونقفلها بقطعة الخبز العلويه وندخلها الميكرويف او الفرن للتسخين..نقدمها مع بطاطس مقلي 😋 وطريقة الصلصه في الصور اللي بعدها🌹
#وصفات_نوره #ساندويتش #ساندويتشات #كفته #كفتة_لحم #كفتة

سلطة البنجر(الشمندر) بالصوص الوردي:
خس (أي نوع) مقطع قطع كبيره
جرجير مقطع قطع كبيره
ذره
بنجر(شمندر) طازج او معلب .. مبشور او مقطع مكعبات
للصلصه:
في الخلاط تحطين كميات حسب الرغبه من:
صلصه فرنسيه
صلصه ايطاليه
صلصة رانش
قطع من الشمندر(طازج ومسلوق لين يكون مره طري) او معلب ومايحتاج سلق
*في صحن التقديم تحطين اول طبقه خس وفوقها الجرجير وفوقها الذره وبعدها الشمندر
واخر شي تحطين عليها الصوص
سلطه مفيده جداً .. واللي ماتبي تستخدم هذا النوع من الصوص..تقدر تستبدله بملح وليمون وزيت زيتون ودبس رمان او خل بلسميك او خردل.
#وصفات_نوره #سلطات #سلطه #مقبلات #بنجر #شمندر #شمندر_بالجرجير

فاصوليا بالزيت
نصف كيلو فاصوليا مغسوله ومقطعه بشكل مائل ///
بصله متوسطه مقطعه جوانح
2 طماطم متوسطه مقشره ومقطعه مكعبات صغيره
عصير ليمونه كبيره
ملح وفلفل اسود وكزبره ناشفه
4 فصوص ثوم مهروس
ملعقتين كبيره كزبره مفرومه ناعم
زيت زيتون..ماينفع اي زيت ثاني .. مايعطي نفس النكهه
الطريقه:
نسخن الزيت في قلايه او تاوه ونضيف البصل ونقلبه لين يذبل تماماً..بعدين نضيف الفاصوليا ونقلبها 10 دقايق..بعدين اضيف الملح والبهارات واستمر في التقليب بعدين اضيف الطماطم واقلب المكونات واضيف قليل مويه(تقريباً نصف كوب) واغطي القلايه واتركها على نار هاديه خمس دقايق تقريباً بعدين اشوف اذا استوت او باقي..اذا استوت اضيف عصير الليمون عشان يحافظ على لون الفاصوليا ويعطي طعم لذيذ..واذا باقي ما استوت اضيفي قليل مويه وغطيها مره ثانيه..مع اني افضلها تكون باقي تقرمش ماتكون مررره مستويه..اخر شي تسوين تقلية الثوم والكزبره..تحمسين الثوم في زيت زيتون لين تطلع الريحه بدون مايتغير اللون وبعدها تقفلين الناو وتضيفين الكزبره وتقلبيهم بعدين تضيفينها على الفاصوليا وغطيهم واتركيها خمس دقايق عشان تتجانس النكهات..وممكن تعدلين الملح في الخطوه..
وقدميها مع رز ابيض او خبز..وتقدم ساخنه او بارده وبالعافيه
#وصفات_نوره #فاصوليا #فاصوليا_خضراء #فاصوليا_بالزيت #لوبيا #لوبيا_بالزيت

باذنجان بالبطاطس والحمص
٢ باذنجان كبير مقطع مكعبات ومقلي
٢ بطاطس كبير مقطع مكعبات ومقلي
١ بصل كبير مفروم
١ فلفل بارد مفروم..وممكن اضافة قطع فلفل اخضر حار 😋
٢ طماطم كبير مقشر ومفروم صغير(مقطع صغير بالسكين)نحتفظ بكميه قليله للتزيين
٤ فصوص ثوم كبيره مهروسه
كوب حمص(بليله)
عصير ليمونه كبيره.
ملعقه كبيره خل ابيض
٣ ملاعق كبيره دبس رمان
نص حزمه بقدونس مفروم..نحتفظ بكميه قليله للتزيين
نص كيس توابل الدجاج من اسناد و ممكن استبداله بمكعب ماجي
ملح وفلفل اسود وكمون وكزبره ناشفه
الطريقه:
تسخنين زيت زيتون في قلايه (تاوه) كبيره وتضيفين البصل وتحمسينه لين يصير لونه اشقر بعدين تضيفين الملح والبهارات وتوابل الدجاج وعصير الليمون ونقلبهم تمام..بعدين اضيف الطماطم والفلفل والثوم والخل ودبس الرمان والحمص ونقلبهم وبعدين نضيف البطاطس والباذنجان والبقدونس ونقلبهم بهدوء لين تتجانس المكونات ونحطه بطبق التقديم ونزينه بالطماطم المفرومه والبقدونس وقليل دبس رمان وزيت زيتون
تقدم مع الخبز او الرز الابيض
لذيييييييذه 😋
#وصفات_نوره #وصفات_سورية #مقبلات #مقبﻻت #مقبلات_خفيفه #مقبلات_شامية #باذنجان #حمص #بطاطس #بطاطا

كيكه بقطع الفراوله والشوكولاته البيضاء:
اصبع زبده بحرارة الغرفه
كوب سكر
بيضتين
ذرة فانيلا
علبة زبادي
كوب ونصف دقيق منخول
ملعقه كبيره بيكنج باودر
ذرة ملح
فراوله مقطعه مكعبات صغيره(مغطاه بدقيق)
حبيبات شوكولاته بيضاء(مغطاه بدقيق)

الطريقه/
نخفق الزبده والسكر بعدين نضيف لها
البيض والفانيلا ونخفق زياده وبعدها نحط
الزبادي ونخفق
بعدين نضيف لها الدقيق والملح والبيكنج باودر
ونخفق يدوي
نضيف الفراوله والشوكولاته البيضاء ونقلّبها بالملعقه بهدوء
ونحطها في صينيه مبطنه بدقيق وزبده او بخاخ مانع للالتصاق وعلى الفرن لمدة نصف ساعه(وممكن اكثر على حسب شكل القالب وحجمه) من تحت على حرارة متوسطه(١٨٠ درجه) وبعدين نحمرها من فوق..وبالعافيه
#وصفات_نوره #كيك #كيكه #فراوله #شوكولاته_بيضاء #حلى #حلا

يخنة البطاطس بالدجاج
١ بصل مفروم
٣ بطاطس مقشر و مقطع مكعبات صغيره ومقلي
دجاج ٥٠٠ جم مقطع صغير وممكن استبداله بصدور الدجاج
ملح وفلفل اسود وكزبره وكركم
٣ فصوص ثوم مهروس
عصير ليمونه
ربع حزمه كزبره مفرومه
الطريقه:
تحمسين البصل في زيت زيتون لين يصير لونه ذهبي فاتح بعدين تضيفين له الدجاج وتقلبين ٣ دقايق بعدين تضيفين الملح والبهارات وتقلبين دقيقتين.بعدين تضيفين ماء مغلي(يغطي سطح الدجاج)ونغطي القدر ونتركه على نار وسط نص ساعه..بعدها اضيفي البطاطس المقلي وقلبيه بهدوء مع مرق الدجاج..واتركيها من ٧ الى ١٠ دقايق وبعدها قفلي النار..بعدين تسوين تقلية الثوم(تحمسين الثوم في زيت زيتون لين تطلع ريحته وبدون مايتغير لونه بعدين تقفلين النار وتضيفين له الكزبره المفرومه وتقلبين وتضيفينها لليخنه)واضيفي عصير الليمون وتقلبين بهدوء عشان ماتنهرس المكونات..
يقدم مع رز ابيض 👌🏻
وجبه سهله ولذيذه
#وصفات_نوره #يخنه #دجاج #بطاطس

سلطة الجرجير بالمانجو
* 4 اكواب جرجير وّرق ومقطع إلى شرائح * 1 مانجو طازج مقطع إلى مكعبات صغيرة * ربع كوب توت بري مجفف .. استبدلته بالرمان
* لتحضير الصلصة: * كوب زيت زيتون
* عصير ليمون حامض - 3 ملاعق كبيرة * سكر - ملعقة صغيرة * ملح - ملعقة صغيرة * بابريكا - ملعقة صغيرة * بصل مفروم فرماً ناعماً - ربع كوب * خردل - ملعقة صغيرة * ثوم مهروس - 4 فصوص
الطريقه:
1- ضعي الجرجير ومكعبات المانجو والتوت البرّي في وعاء كبير
2- لتحضير الصلصة: أخلطي الزيت وعصير ليمون الحامض والسكر والملح والبابريكا والخردل والبصل والثوم في الخلاط الكهربائي حتى تتجانس المكوّنات.
3- أسكبي الصلصة في وعاء وقدّميها جانباً إلى جانب السلطة.
*ممكن اضافة الفراوله والكيوي 👍🏻 وأضفت عين الجمل
*لذيذه وتغيير عن السلطات المعتاده✔️
*باقي زياده من الصلصه وحفظتها في علبه قزاز واستخدمها خلال يومين
#وصفات_نوره #سلطات #مقبلات #سلطة_جرجير #رمان #مانجو #منقا #سلطه

أفخاذ الدجاج بصلصة الباربكيو
٨ قطع افخاذ دجاج
ثلث كوب صلصة الباربكيو
ثلث كوب صلصة الصويا
ثلث كوب خل بلسميك
ثلث كوب كاتشب
رشة فلفل اسود
٣ ملاعق كبيره سكر اسمر
٤ فصوص ثوم مهروس
ملعقه كبيره زنجبيل مبشور او معجون
الطريقه:
اخلطي جميع المكونات مع بعض حتى تتجانس ثم اضيفي اليها قطع الافخاذ وقلبيها جيداً..واتركيها لمدة ساعتين في الثلاجه..
احضري صينية فرن تيفال .. او صينيه عاديه مبطنه بورق زبده..و ضعي فيها القطع مع الاحتفاظ بخليط الصلصات..وادخليها الفرن بدرجة حراره ٢٠٠ درجه مئويه في الرف الاوسط وبدون ان تغطي الصينيه..لمدة ٤٥ دقيقه تقريباً..وكل عشر دقائق اخرجي الصينيه ووزعي من الصلصه فوق كل قطعه وادخليها الفرن وبعد عشر دقائق اخرى كرري اعادة وضع الصلصه .. ممكن الاكتفاء بتغطيتها مرتين..اما من يحب النكهه تكون واضحه جداً(لمحبين الاكل الصيني) يعيدون المرات الى ان تنتهي مدة الاستواء..
ضعي الافخاذ في طبق التقديم وزينيه حسب الرغبه وبالعافيه
#وصفات_نوره #افخاذ_دجاج #افخاذ_الدجاج #باربكيو #صيني

Most Popular Instagram Hashtags